Convention Centre aiah Vanapa Hall

Assam Rifles ram chhuahsan hman dan tur ngaihtuahtu Advisory Committee chuan, Assam Rifles chhuahsan ramah Convention Centre sak ni se tia a lo rel tawh chu Vanapa Hall hming puttir ni zawk se tiin nimin khan an rel a.
Sawrkar thuchhuahin a tarlan dan chuan: “Vanapa Hall hi a upat tawh avangin Assam Rifles insawn hma khan sorkar chuan sak that a tum thu a lo puang tawh a. Nimahsela, Assam Rifles an insawn takah chuan Vanapa Hall lian zawk leh changkang zawk sakna tur hmunhma a lo awm ta a. Chuvangin, Advisory Committee hian Convention Centre sak an lo pawm fel tawh chu Vanapa Hall hming puttir an rel a. Tuna Vanapa Hall hi chu sorkarin a hmanna tur a ngaihtuah dawn…” tih a ni.
Convention Centre hming kha Vanapa Hall tia thlak a ni dawn a, tuna Vanapa hall dik tak zawka hi thil dangah hman a ni dawn a, hming thar a pu tawh dawn, tihna a ni awm e.
“AR lammual hi Mualpuia Rajiv Gandhi Stadium hming puttir zawk ila, RG Stadium hi a hming thlakin thil dangah hmang tangkai ta ila..” tih ang vel a ni awm e.
RG Stadium sak dawn khuan a lungphum phum turin Rajiv-a te nupa an lo kal vang vang a, lungphum phumtu hming chawiin Rajiv Ganhi Stadium tih a ni ta a, chu chu a hming hlutna a ni.
Convention Centre hi kan hnam mi ropuite hming chawia a hming vuah kan duh a nih pawhin, a hming kan lo hman tawhsa Vanapa hming ni lo, hmanlai lal ropui hming emaw, pasaltha hming emaw, mi bik, zaithiam, hla phuah thiam etc. etc. kan ngah a, hnam thil chawilarna remchang tak a ni nghal dawn a ni.
A thuhrimin, Vanapa Hall hi AR insawn hma pawh khan sak that tum a lo ni tawh a, ruahmanna awmsa a nih chuan kaltlangpuiin a hming pawh thlak kher a tulna a awm lo a. Tuna Convention Centre hi mipui dawng hnem tur zawk a ni a, Vanapa Hall-in a thlen zawh loh chu a thleng mai dawn a, eng chu nge a hming han thlak kual vel chu a tul em emna leh a ropui bik viauna tur tih hi zawhna awm thei a ni awm e.
Vanapa Hall hi a hming thlak ni mah se, Mizo thinlungah chuan tuna a awmna hmunah hian a la awm rengin a rinawm.
A thuhrimin, Aizawl traffic tawt lutuk thawlh thawl kan mamawh em em lai a, a lai lum lama mipui punkhawmna tur ang chi la din belh sauh sauh hi kan dinhmun nen hian a inhmeh tawh lo viau a ni. Tuna AR chhuahsan ram thenkhat la hek hian kawngpui zau zawk siam pawh ni se, helai hmun pan khawmtute kalkawng a zau belh chuan si loh chuan, a laili lamah kan in-êk beng nghek nghek ang a, traffic hi a tawt zual sauh dawn tihna a ni ber a; hmathlir hi a la thui hleithei lo chu a ni ber awm e.