Cooperative society kalphung siamthat tul nia hria in Mizoram Cooperative Siamtha Pawl (MCSP) din thar a ni a. Thingtlang loneitute tana agriculture credit society tam zawk din leh rural credit network tihchak theihna’n hma lak an tum.
Thuthar thehdarhtute hnenah MCSP chairman C Lalchawimawia chuan Mizoram pum huapa cooperative society zawng zawng huapzo turin mi thahnemngai kalkhawmten kumin January khan Mizoram Cooperative Siamtha Pawl hi an din tih a sawi a. Mizoramah cooperative movement chu kum 1949 atanga bul tan a ni, tiin, ram thang zelah cooperative movement chu kawng hrang hranga siamthat a tul nian hriat avangin MCSP chuan siamtha turin hma an la mek tih a sawi.
Eizawnna leh a member-te tana hmasawnna atan primary society tam zawk din a, chumi tichak leh thuamchak tura federal society hman tangkai te, cooperative federal movement siamthat leh tih chakte chu an pawl thil tum ber a nih thu leh, cooperative chhunga party politics ang maia pawl inthenna nuaibo leh dikna leh rinawmna tundin an tum thu MCSP chairman hian a sawi bawk.