Cooperative society thawk thate hnena hlan thin, National Cooperative Development Corporation (NCDC) Regional Awards for Cooperative Excellence and Merit 2023 chu Ningani khan Aizawlah sem a ni. Hmanpuitu Cooperation minister PC Vanlalruata chuan society-te tichangtlunga chawikang zel tura tan lak a tul tih sawiin, sawrkar policy ‘Bana Kaih’ ah cooperative society-te tangkai taka hman tum a ni a, hemi tur hian kan theihna leh thiamna tihpun a ngai tih a sawi. Sawrkar hmalaknaah society tel loa kal a harsa dawn tih a sawi a ni.
PACS computerization kalpui mek a nih thu leh tuna PACS 25 kalpui mek bakah a dang pawh buaipui zel tum a ni tih a sawi.
NCDC Regional Awards for Cooperative Excellence and Merit hi kum hnih dana sem thin niin, North East State-a cooperative society hnathawk thate hnenah NCDC bultuma sem thin a ni. Society hnathawh dan leh an dinhmun tehna hrang hrang point 6 hmangin State Level Selection Committee kaihhruaiin an thlang thin a ni.
He award-in a tum ber chu, ram hmasawnna kawnga cooperative society-te pawimawhna leh tangkaina hriatpui, cooperative-ten a bulthut atanga ram hmasawnna kawnga tha an thawh theihna tura inelna thianghlim buatsaih a ni.
Tun tuma NCDC Regional Awards for Cooperative Excellence and Merit hnuaiah hian society pathumin chawimawina an dawng a ni.
Best PACS Category:
Excellence Award : Champhai Large Size Agriculture Multipurpose Cooperative Society Ltd. – citation leh Rs. 25000
Merit Award : Vaphai Primary Agriculture Credit Cooperative Society Ltd. – citation leh Rs 20000
Best Societies in 2 prominent sector hnuaia consumer sector-ah Kawnpui Consumer Cooperative Society Ltd. in chawimawina dawngin citation leh Rs. 25000 a kengtel.