Colombia lakah goal thun harsat mah se extra time minute 112-naa Lautaro Martinez-a goal hmangin defending champion Argentina chuan 1-0 hnehna nen an Copa America title kawl lai an humhim a, he tournament-a vawi 16 champion thei awmchhun an ni ta.
Miami khawpuia Hard Rock Stadium khat tlat mipui pungkhawm hmaah captain Lionel Messi chuan goal a khung zo lo mai ni loin second half laihawlah hliam avangin mittui nen khelmual a chhuahsan a, mahse, hun a tawp meuh chuan major tournament-a vawithum champion zawn thei nihna nen Argentina champion a lawm zui leh thei ta tho a ni.
Team khawng ve tak Colombia-in penalty an nghakchhuak hman teuh hle a, mahse, Giovani lo Celso through ball hlawkpuiin Martinez chuan team pahnih inthenhranna goal langsar a thun a, an game khelh hnuhnung 28-a tlawm pumpelh fai vek Colombian-hoin tlawm an pumpelh reng seng ta bik lo a, nimin zing match khelh hma zawnga an tlawm hnuhnunber kum hnih liamtaa World Cup qualifier-a an ngam lo Argentine-ho lakah bawk an chak lo zui leh ta a ni.
Hard Rock Stadium pawn lama buaina chhuak avangin inkhel tan hun kha minute 80 zetin an sawn tlai a; organiser-te sawi danin ticket chang lo fans lamin khelmual chhunga luh luih an tum a, police officer rual leh security duty dangte nen an innawrbuai nasa a, mi engemawzat man niin, he buainaa inhnamhnawih supporter thahnem tak chu damdawi hmanga enkawl an ngai hial a ni!
Half-time break pawhin minute 25 chhung zet a awh a, a chhan pawh khelmual chhunga Colombian popstar Shakira ‘concert’ an han en leh rih vang niin, a hnuah inkhelh laklawh laia han zai leh rih chiam ngai kha Colombia boss Nestor Lorenzo chuan a sawisel nghe nghe.
Miami khawpui luam uap hnawng churh hnuaiah team pahnihin ‘clear chance’ han tih tur tling pha siamchhuah an harsat ve ve a; first half chhunga thin han tiphu langsar chu Colombia player Jhon Cordoba chanvo niin, goal ban a fuh.
Minute 15 chauh awm tawhah Argentina khan hmahruaina goal an thun a, an champion-na goal ni thei mai dawna a lan tawh laiin Nicolas Tagliafico goal kha offside vanga hnawlsak a ni.
Tarlan tak angin, Martinez chuan chakna goal awmchhun khungin ‘hero’ nihna a chang a, tournament chhunga goal nga a tihluh hmangin top scorer lawmman Golden Boot a dawng zui bawk.
Lionel Messi kha kum 34 a tlin hmain senior international tournament-ah a champion zo lo a, tunah erawh a zawnin major title vawithum a hlawhchhuak thawt a, 2021 Copa America, 2022 World Cup leh 2024 Copa America-ah a ram a champion-pui fai vek!
Nimin zinga Copa America final khelhna Hard Rock Stadium kha Messi club Inter Miami thuthmun Fort Lauderdale atanga mel 20 leka hla ni mah se kum 37-a upa Argentina superstar kha Miami khaw inkhel lianah beisei angin a chetha zo ta bik lo a, US, Canada leh Mexico inthlentawm tur World Cup lo herchhuak leh hmasaber turah hian kan hmu leh dawn em tih hriat theih a ni rih lo.
Tuntum Copa tan hma lawk khan Messi hian next World Cup-a ram tana inlan leh turin thutlukna a la siam lo tih a sawi a, an champion hnuah thu thar a la nei leh ta rih lo.
USA leilunga tournament khelh zawh takah khan semi-final match-a Canada an hneh tumin Ballon d’Or chawimawina vawiriat dawng tling awmchhun Messi khan goal khat a thun a, kha kha tournament chhunga a goal neihchhun niin, quarter-final shootout lama Ecuador an paltlang hram tumin penalty a thelh bawk.
Final-ah Colombian player-te’n an dim lo hle a, first half-ah a inhliam hman der a, mahse, khelmual a chhuahsan tak erawh second half lamah niin, bench lamah a kheimit na chu ice pack hmangin a dep a; beisei a phak tak loh avangin football-a hlawhtlinna zawng zawng huikimtu hi major tournament-ah kan hmu tawh lo mai ang em tih zawhna a piang zui ta hial a ni!
‘La Albiceleste’ tana a khelhpui kumhlun zinga pakhat kum 36-a upa ni ve tawh Angel di Maria tan chuan Thawhtanni zing inkhel kha a international career kharna niin, a hmain Copa zawh ruala a chawlh tur thu a lo nemnghet tawh a, ram tana game 145 zet khel tling chungin international stage a chhuksan ve ta a ni.
Argentina team-a veteran player dang, kum 36 mi ve bawk defender Nicolas Otamendi pawhin a international career zial fel ve a tum hnaih thu a sawi ve bawk.
Copa title 16 la tling thei awmchhun Argentina
