Daily Newspaper

CORONA VIRUS PANDEMIC MALSAWMNA

8

Ruatfela Nu

Thuhma:
Thla hmasaah “Hripui len hnua nunphung thar nunpui tlak” tih article kha feedback duhawm tak tak ka dawng a. A bikin inrenchem tumte an ni. Mi pakhat phei chuan ka article a chhiar zawh atangin kuhva khawr a nghei phah tih min rawn hrilh a, kuhva khawr a nghei vanga ni thum chhung leka chhungkaw tangka a save chu chawlhni tuk sa theh hmui hukna tham a ni a, ka lawmpui takzet a. Pathian hnenah mite thinlung thlakthleng thei article dang min pe leh turin ka dil hial a. “Hlawhfa leh a ruaitu” tih ka ziak a, a hit viau nain kha kha chu keima irawm chhuak, kum leh khuaa ka thupui sa niin ka hre si a, ka dil zel a, hei hi min pe leh ta a, mi pakhat talin hlawkpui leh se ka ti hle!

Corona virus pandemic hi keimah leh kan chhungkaw tan khawnvar eng tak a ni: A tir lama ka hlauhzia chu namen a ni lo a, zahthlak zawk khawpin ka hlau a. Engmah thawk thei loin tv hmaa chanchinthar en ringawtin thlakhat vel zet ka thu a, ka taksa a thau tual tual a, ka rilru lam a cher tial tial thung a. ‘A ni thei lo. Isua hnungzuitu, kristian ka ni a, ka hlauh em em chhan hi thih ka hlauh vang mai mai a ni. Pathian zarah damtein ka awm ang a, ka la thi ve dawn tho tho a, hlauh loh deuh tur a ni’ tiin ka infuih a. News ka en duh ta lo a, lehkhabu tha leh Bible ka chhiar a, keyboard ka zir a, fak hla ka tum a, hlauhna ata ka dam ta. Lehkhabu tha tak tak bu-7 ka chhiar zo a, a then phei chu ka chhiar nawn a. Favang a lo nih phei chuan kan hna (project) kal lai, corona virus pandemic vanga kan thawh theih loh chhunzawmin Mizoram khawchhak lam khaw tam takah ka zin chhuak ta hial a ni.

Ka nuta te pali, sawrkar leh kohhran hnuaia (missionary) an hnathawh hlawh, (ka u chu a pension tawh) nghei loh deuhna chauha lungawi vel mai mai thin ten, ei leh bara intodelh tuma tan an lak mek lai, kuhva leh serthlum an chin tawh chu, corona virus pandemic vanga hak zauhin taihmak an chhuah lehzual a. Chulte ritin buh an ching a, an inpeizawn zel, rawngbawlna avanga state danga awm pawh an kep zel a, an fate lehkha zir sang tak tak pawh hnathawh kawr hain ram an riak kumtluan a, khuarei daih chi kuhva leh serthlum an chin baka kumkhata seng theih, buh, hmarcha leh thil dang an thar chhuak a, buh hi an vaia thar belhkhawm chu tin 500 lai a ni. Heng hi khawvel pum huap hripui leng harsatna leh hun khirhin a tha zawnga keimah leh kan chhungkua hmasawnna min pek a ni. Hma lam hun hriat loh atana inbuatsaihna, taihmakna, tumruhna, teirei peihna, mahni intodelhna duhnate hi a then chu kan neihsa a nih rualin, hun thimin enga min hruai luhna a ni tel bawk e.

Mi tam takin tan an lak phah bawk: Ka sumdawnaah thingtlang khaw hla taka unau lehkha thiam ve ve ka ruai a, hripui leng vangin an hawng a, an chhung ten ring thar zimte an loh vah bakah chul an rih belh a, buh leh sumchang thlai chinga lo lam hna an thawh tluk tluk thu min hrilh a. Chul rih chu a hautak a, mahse pandemic nghawng, ei leh bara harsatna a lo thlen hun atana an inbuatsaihna a nih vangin thahnemngai takin an thawk tih ka hre thei a. Aizawla mi in luah a, lehkha zir paha hlawh tlemte hlawha mi hnuaia inhlawhfak ai chuan, mahni hna ngei thahnemngai taka thawh a, an thawh rah an seng zela an hlimna chu a thuk a ni. Pandemic hma chuan nu leh pa, chhungkua inthendarha Aizawlah a thenin lehkha an zir a, a thenin inhlawhfa chawpin an chawm kha hmasawnna riakah an ngai a. Mi tihdan lo pawh a ni lo a, a awm ve tho a, engtik niah emaw, chhungkaw inghah nan, political fitness nen emaw tal sawrkar hna an la hmu ve ang a… tih an beisei vang a ni ber awm e.

He ngaihdan thawheng tak hi thingtlang nu leh pa tam tak ngaihdan a ni a. Rethei bakberhin a upa zawk ten hna an thawk a, an fate zirna an duhsak vangin rethei bakberh bawkin khawpuiah, mi in hnuai luaha rual awt reng rengin an nung bawk a. Nu leh pate beisei ang ngeiin thingtlang mi pawhin lehkha thiam, BA leh MA an zir chhuak ruih ruih a. Mahse mahse khawnge thiamna kan tih rah chhuak chu? Thiamna nge hlu hmalam hun atana inbuatsaihna nei thei/thiam tura finna? Tute nge mi thiam chu?

Ka nau (ka hlawhfa rawih thin) te kha mi thiam dik tak an ni. Chutiangin ka vahte leh mi dang tam tak pawh. Hun harsa takah hahdam takin an tih tur an ti a. Zahawm takin mihring ngaihtuah pha baka hunkhirh lo thleng an hmachhawn a. Thil lo thleng chu fing tak leh huaisen takin an ngaihtuah a. Mamawh hun atan inchhekkhawl pawimawhna an hria a. Lehkha zir sanna ngawt emaw, lehkha thiam intihna ngawt emawin a tibuai lo. Chu chu corona virus pandemic malsawmna an dawn a ni. Hun thim khirhin mimal, chhungkua leh khawtlang nuna eng a thlen thin changtu zing mi an ni.

Zirna in khar leh kum hloh a pawi lo lutuk: Mihring maktaduai chuang thihna thlentu, 1918 atanga leng tan, Spanish Flu avang khan khawvel huapa zirna in changtlung leh ropui ber zinga mi, Oxford London, UK chu kum thum deuhthaw a ram/khar a ni a. Tunah chuan a hma aiin a changtlung deuh deuh a, a ropui tawlh tawlh. Zirna in te chu pandemic a reh hunah emaw, vaccine awm hunah emaw hawn chhunzawm leh mai tur. Nu leh pa tan fate’n zirna kum an hloh pawh pawi tih vak loh tur. Miin eng hna pawh a dil hian “kum engzat i nihin nge pawl 10, 11, 12, 13, 14,15, i pass?” tiin an zawt ngai lo hrim hrim! Za zel an mark hmuh leh an nungchang, an khawhawi a zau em tih daih a ni an en zawk thin. Lehkha zir thiamna ngawr ngawr hi khawthlir dik neihna a nih chuang lo a, mihring chhawrtlak nihna a ni lo bawk a, hlawhtlinna lah a nih hek loh. Chuvangin nu leh pa, zirna ina zirtirtu leh zirna lam thuneitu ten he hripui hi malsawmna a nihna turin han chawl thuap ngam rih teh u. In lama chhang (cake) siam leh chuktuah huan siam tui thar hlutna te hi corona virus pandemic malsawmna a nia sin.

A huhoa Pathian biak inkhawm leh inkhawmpui: Pandemic tuar na lo ramte chu khawtlang nun invawng apiang an ni. Sawi thuina hun leh hmun a awm lo a. Hri inkaidarhna 33.3% (hmun thuma thena hmun khat) hi chu thuawihlohna avang niin a hriat a. Chuvangin kohhrante pawhin pung khawm lo zawnga mimal leh chhungkuaa Pathian biak kan tih mek hi pandemic malswmna a nih kan hriat a tul hle. Inkhawm vanga emaw, inkhawmpui vanga emawa hri inkaidarhna a thlen chuan malsawmna lehlam chiah ‘anchhia’ a ni ngei dawn si. Pathian be tura zalenna kan neih hi hun thim khirh berah pawh pangngai rengin kan nei a. Tumahin khawi hmun leh hunah mah min chhuksak thei lo. Nghak leh hret ila, Pathian biaa fakin kan zaiho leh thei dawn chiang a. Khawvel a tawp hman lo ang.

Hun thim khirh atangin êng a lo lang thin:
Tuarna phena malsawmna tih leh tuarna pawh hlawkna tih hi khawlvel puma kristiante testimony a ni a. Tuarna pawh hlawkna hi Lal Isua lo kal leh thlengin a dik ziktluak parh dawn bawk. Chu lo pawh vawiin thlenga hetia nung dama kan la awm hi kan testimony a ni ve e, a chhan chu Europe, North America leh Latin America ah te corona virus vangin an thi tam lutuk! Kan chipui, kan mi lungduh, hripui vanga thite lah chu kristiante rindan chuan ropuina rama kaisang an ni a. Kan inhmangaih em vangin kan ngai mai mai a. Dik tak chuan lawmpui zawk tur kan nia.

Chuvangin he pandemic hi chhung lam leh pawn lam malsawmna, thatchhe thin tan taihmakna, hmalam hun thlirna chang hre lo ngai loa nitin khawsa ve naw naw thinte tan hmalam hun thlir thiamna, inkhawhral huau huau thinte tan inrenchemna chang hriatna, mamawh hun/ hun harsa leh khirh a lo thlen thulh atana tangka khawl (savings) na chang hre ngai lote tan hriat tawhna, faina leh hriselna ngaihpawimawhna chang hre ngai lote tana hriatna hnar hlu tak a va’n ni em! Hetiang mi hi pandemic hian a hring chhuak teuh tawh a, a hrin chhuah zel pawh a beiseiawm. A bikin thingtlang lam miin ei leh bara intodelh turin, lo neih tihhmasawn kawngah tan an lak nasat phah hle a. Pandemic malsawmna an dawng mek a, an rilru sukthlek enin khawpui nun an awt tawh bik lo a. Khawpui mi hian kan la awt zawk mai thei e. Mahni inrintawkna nen malsawmna an dawng zel ang tih pawh ka beisei a ni.

Thangkhatlian liam tawha Mizo zaithiam ngaihsanawm tak, Lalrindiki Khiangte (Daduhi) nen, Saituala headquarters nei, Kuthnathawktu Pawl kha, daily news paper behchhanin kan vaw lian a, mite fuihphur turin thingtlang khaw tam takah kan zin zui a. Kuthnathawktu pawl vuak len a, movement siam kha tul kan ti dun takzet a. Daduhin nauno a la pawm chungin thingtlang mite retheihna kha a tahpui thin a ni. Tunah chuan tahpui tur khawpa rethei an la awm a nih pawhin, ni za inhlawhna leh healthcare ten a chhan deuh tawh a, sawrkar laipui ruahmanna tam tak hnuaiah lei rem an rap a. MGNREGS erawh an innghahna ber a ni lo. An innghahna ber zawk chu an rilru sukthlek leh an khawthlir dik tak vang a ni tih an hre kher lo ang a. Zirna hi eng nge a nih? Hna hmuh nan a ni, tih zawhna leh chhanna an inpek thin kha, hna a awm tawh lo tih an hre tan a. Hmasawnna chu thawhrimna leh teirei peihnaah a awm tih hi thurinah an nei tawh. Chu an thurin la derthawng tak chu, corona virus pandemic avang hian 2021-22 chhoah tam a thlen thei a, kan inbuatsaih lawk a ngai tihna chang hriatnain a tihngheh sak mek a ni.

Hun thim hian hruaitu tha rawn en chhuahpui tak ang maw?:
Great Britain/ Europe a Angry Young Men, America Great Depression, khawvel ram hranga hranga Indona vanga emaw, hri vang emaw, Cold war vang emaw, eng vang pawha hun thim, a bikin chung ina a nghawng, ei leh bar harsatna avanga ram leh hnam nuna harsatna a thlenin, hruaitu tha an lo chhuak a, hmasawn dawrhna an thlen thin tih kan hria. Hun thimin mimal leh chhungkuaah eng a thlen a nih pawhin, ram leh hnam hi mimal nun inhlawmkhawm tho a nih avangin leadership quality nei neih chu a pawimawh ber ta tho tho a. Mimalin chhungkua a siam a, chhungkuain khawtlang nun (society) a siam a, khawtlang nun tam tak inbelhkhawmin ram leh hnam a siam chauh a ni a. Hruaitu tha an lo chhuah phah loh chuan mihring nun inmamawh tawn vek hi a tlusawp thei tho a. Hruaitu tha, pawmdan nei tlur lo, hmathlir nei, rilru suk thlek dik an lo chhuah chuan district, block leh village level- ruahmanna siam hi thil har a ni lo. Mihring kan la tlem lutuk. Kan hlawhchham leh hlawhtlin pui tawh thliar thiam khawpa khawhawi zau hruaitu an lo chhuah chuan emaw, a ni sa an insiamrem duh/theih chuan emaw he corona virus pandemic vanga hmabak hun thim tak hi khawvar alh êng tak a ni thei dawn a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy