Daily Newspaper

Coronavirus: COVID-19 kai thei dinhmuna din

31

Khawvel huapin COVID-19 case-in tlakhniam lam a la pan hleithei lo va, tunah chuan he hri kai te bul hnaia kan lo awm theihna risk hi a sang tawh hle a ni. COVID-19 positive bul hnaia kan lo awm emaw, kan lo intawk fuh (contact) emaw a nih chuan keini pawh hri kai thei dinhmunah kan lo ding ve ta thin a ni.

Hetih rual hian hriattur pawimawh chu engtianga hri kaina risk nei sang nge kan nih tih hi mahni inhriat thiam a pawimawh. Close contact an ti a, chu chu COVID-19 positive-te nena chenho (co-living) hi a ni a, chutiang chuan COVID-19 kai theihna risk hi 50% emaw, a aia sang emaw nei angin an chhut niin Times of India health section chuan a tarlang.

Hetianga COVID-19 positive kan lo chenpui a nih chuan mahni in-quarantine ve nghal a, a symptom kan neih leh neih loh in ngaihven a, in-test ngei tur a ni.

COVID-19 positive chenpuite chu test ngei ngei tur an ni a, a chhan chu a symptom nei kher lo (asymptomatic) chung pawhin a hri thehdarhtu nih palh theih a ni. Hei bakah hian mahni inhriatchian hi a pawimawh ve hrim hrim bawk.

Close contact an tih chin chu eng nge ni? Contact tracing hi hri inkai darh tur venna atana pawimawh hmasa a ni a, chuvangin COVID-19 positive-in a lo contact tawh zawng zawng hriatchhuah a ngai thin. WHO protocol-ah chuan close contact an tih chin chu COVID-19 positive hriatchhuah chu ni 2-10 inkara a contact zawng zawng te an ni deuh bik a, in khata an chenpui te emaw an bul hnaiah hun eng emaw chen lo khawsa te a huam deuh bik a ni.

COVID-19 positive bul hnaiah i lo awm tih i inhriatchhuah hnuah engtin nge i tih ang? Tih tur hmasa ber chu mahni in-quarantine a ni. Midang dinhmun hlauhawma kan dah loh nan mahni inkhung hran nghal tur a ni. Hmaituamna hman tur a ni a, midang bul hnaiah awm loh tur a ni a, kut silfai deuh reng tur a ni. Hmai kan tuam that a, kut kan sil fai deuh reng bawk hian midang kan kai chhawn theihna risk pawh 70%-in a tihniam thei a ni.

Mahni in-quarantine bakah taksa hriselna lam ngaihpaiwmawh nghal tur a ni a, taksain natna a do theihna tichak tura hmalak nghal tur a ni. Tui lum chiala hrawk thuah (gargle), tuihu hip (steam inhalation) te a pawimawh a, chaw tha ei tur a ni a, theirah leh thlai hnaih ei tam bawk tur a ni. Breathing exercise lak that a pawimawh a, rilru tihhah loh hram tum tur a ni a, mahni taksa vawn fai bawk tur a ni.

Engtikah nge in-test tur? COVID-19 test nana hun tha ber hi sawi theih a ni lo, a symptom kan neih dan te leh a chhan hrang hrang avangin in-test hun tura tha ber hi sawi fak theih a ni lo. COVID-19 case tam zawkah chuan a incubation period (a hri kai atanga a symptom lan chhuah hun inkar) hi ni 5-14 te a ni tlangpui. A hri kai te hian a tlangpui thuin a symptom hi kar khatna vel atangin an nei tan a, a kar khatna hi a pawimawh hunlai a ni a, chuvangin COVID-19 test pawh hi a hri kai thei dinhmuna kan din (exposure) atanga ni 4-5 vela test a fuh tlangpui a ni.

Hetihrual hian COVID case tam tak chu asymptomatic- a hri kai si, a symptom nei si lo, te an ni thei a, a symptom kan nei lo a nih pawhin hri kai thei dinhmuna kan din tawh chuan in-test ngei tur a ni a, test result hriat hma chu in-quarantine tur a ni.

COVId-19 positive-te hian eng hunah nge mi kai theihna chance an neih san ber? COVID-19 positive chuan a symptom hi ni 5-10 inkarah an nei tan a, mahse, a symptom an neih hma, darkar 48-72-ah pawh midang kaichhawng thei an ni tawh a, zirchianna neitu thenkhat chuan a symptom lanchhuah hma darkar 48-72 hi midang kai chhawn awlsam ber lai (peak transmission time) niin an ngai hial a ni.

Engtia in-test tur nge? COVID-19 kai leh kai loh test-na hi chi hrang hrang a awm a, test kit tam zawk hi a rintlak viau rualin thenkhat chuan result dik tawk lo (false positive leh negative) te pawh a pechhuak ve thei tlat. RT-PCR hi COVID testing-a rintlak bera ngaih a ni a, result pawh darkar 24-48 chhungin a hriat theih thin. Antigen testing hian hun a duh rei lo va, darkar khat chhungin result a hriat mai theih a ni.

Midang tana kan hlauhawm loh hun engtik nge? COVID-19 kan positive emaw, a kai theihna dinhmunah kan ding emaw a nih chuan kan tih tur hmasa ber chu midang hnaih loh a ni. Hetiang hunah kan rilrua rawn awm thin chu, engtikah nge midang bulah ka awm leh theih ang tih hi a ni awm e. Kan test result a negative atanga kar khat hnuah symptom engmah kan nei lo a nih chuan midang bul hnaia awm a him leh tawh tihna a ni. Test result negative mah se ni sarih chhung chu midang bul hnaia la awm loh tur a ni a, result a negative atanga kar khat hnuah a symptom kan nei lo a nih chauhin midang tan kan hlauhawm tawh lo tihna a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy