Daily Newspaper

Coronavirus: COVID positive-te symptom neih tlanglawn deuh te

123

Coronavirus hripui a len atangin mi maktaduai tam takin he hri hi an kai tawh a, a maktaduai telin an thihpui tawh bawk. He hri kai tawh ten symptom chi hrang hrang an nei a, thenkhatah chuan a thawh dan a nêp viau a, hritlang satliah, hnaptui leh hrawk na ringawt anga a lanchhuah laiin, thenkhatin khawsik sang tak tak neiin, thawk lama harsatna te an nei a, an rim hriatna leh thil tui leh tui lo an hriatna te pawh a bo hial a ni. Tun tumah hian Times of India health section-in COVID positive te insawiselna tlanglawn deuh ni a an sawi te kan rawn tarlang e.

COVID-19 hi thawkna lam khawihbuaitu natna a ni a, miin a hri a kai atanga ni 2 atanga ni 14 chhungin a symptom a langchhuak tlangpui. A hri kaite taksa hrisel dan leh an taksain natna a dolet theihna chak dan a zirin a symptom hi a inang lo thei hle a, mi thenkhatah chuan a symptom engmah lang chhuak lovin, midang hri kai chhawng thei site pawh an awm a ni.
COVID-19 lanchhuah hmasak dan tlanglawn zualte chu:
– Khawsik
– Khuhro
– Chau leh zawi

Heng symptom langsar deuh bakah hian damlo te natdan chi hrang hrang a awm thei a, a symptom pawh nasa vak lo atanga nasa tak, thihpui theih hial khawpa nasa te pawh a ni thei. A thawhdan hi mi hrang hrangah a inang lo thei hle a ni. Chutiang karah chuan a chunga kan tarlan tawh a symptom tlanglawn zual baka COVID-19 positive te insawiselna dang tlanglawn leh deuh te chu:
– Taksa sil leh khamna
– Hrawk na
– Rim leh tui leh tui lo hriatna hloh
– Hnaptui
– Awmbawr na leh thawk lama harsatna

Damlo thenkhat chuan pum nuam lo leh mit infection te an neih bakah ngaihtuahna hmang tha hleithei lo te pawh an awm thei.
COVID-19 damlo thenkhat chuan a symptom dang an neih hmain pum nuam lo leh kawtha lo leh luakchhuak te an nei hmasa a, American Journal of Gastroenterology-in a tarlan danin China-ah chuan COVID-19 damlo 48.5%-in pum lama insawiselna an nei.

COVID-19 damlo zingah mit lama insawiselna, a bik takin Conjunctivitis an pung nasa hle a, mit a vûngin a sen rûm thin. Hetiang symptom hi coronavirus damlo thenkhatah a lanchhuah dan pakhat a ni.

COVID-19 hian thluak lam pawh a khawih thei a, brian fog an ti mai a, ngaihtuahna a tibuai a, chiang lo deuh ruaiin a awm theih.

Wuhan University hnuaia Zhongnan Hospital-a COVID-19 positive 140 zinga zirchianna an neih thar atanga an hmuh danin khawsik sang chu a natna lanchhuah dan tlanglawn ber a ni a, khuh ro chu a dawttu niin, damlo 140 zinga hmun thuma thena hmun khat chuan tihrawl na leh thawk lama harsatna te an nei a ni.

Engtikah nge ngaih tih that loh tur? COVID-19 positive mahse symptom nei nasa lo te chu damdawi ina enkawl kher an ngai lo a, chutih rualin ngaihthat lohna chang hriat hun tur hriat erawh a pawimawh. Thawk lama harsatna i nei emaw, i awmbawr-ah na a awm emaw, i rilru a buai deuh a, i ngaihtuahna te i sawrbing hleithei lo a nih chuan a rang thei ang berin damdawi lam thiam te i rawn vat dawn nia.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy