Daily Newspaper

Coronavirus variant thar vangin hlauthawng

21

Coronavirus variant thar hmuhchhuah leh niin inkaichhawn awlsam ber chi niin sciencetist te chuan ‘tihbaiawm’ tihialin an sawi a, coronavirus variant zinga chhe ber tihialin an sawi bawk.

South Africa province pakhata hmuhchhuah niin engtianga darhsarh tawh nge tih hriatchian a la ni lo bawk.

Engtianga chaka inkaichhawn theih nge a nih tih te, vaccine in a veng em tih te chu hriatfiah a la ni lo bawk a. Zawhna tam tak awmin chhanna mumal leh fel a la awm thei lo thung.

He variant hi B.1.1.529 tih niin Greek code-name (Alpha leh Delta ang in) la pek tur a nih thu World Health Organization te chuan an sawi.

Inkaichhawn leh intipung chak lutuk niin Prof Tulio de Oliveira, director of the Centre for Epidemic Response and Innovation, South Africa chuan a sawi a. A inthlahpun dan pawh danglam bik leh variant dang te nena inang lo tak tiin a sawi bawk.

Prof de Oliveira chuan mutation 50 awm tawhin spike protein 30 chuang a awm tawh bawk tiin a sawi a, hei hi vaccine-te pawhin an thlurbing ber leh virus-in kan taksa cell luh a tumna pawimawh ber lai a ni bawk.

Receptor binding domain (virus leh kan body cell te intawhna hmasa ber) ah pawh mutation 10 a siam hman a, khawvela inkaichhawn tipung nasa ber Delta variant chuan pahnih chiah a siam thung.

Hetinaga rang taka a inthlah danglamna hi a chhia tihna a ni kher lo thung a, mahse, heng inthlakdanglam te hian eng nge an hnathawh dan zui zel tih chu hriat ngai a ni thung.

Tuna variant thar an hmuhchhuah hi Wuhan, China a an hmuhchhuah nen chuan an danglam hlak tia sawi a ni bawk a. Chumi awmzia chu vaccine kan lak mek te, original strain behchhana design te chu tuna variant thar lakah hian a rintlak dawn em tih a chiang lo.

Virus variant inthlak danglam thenkhatte chu inkaichhawn awlsam zawk a ni a, N501Y te pawh inkaichhawn awlsam zual a ni a. Variant thenkht chu antibody tena an hriatthiam lawk loh te awmin chu chuan vaccine effective na a tihniam thei thin a, variant thenkhat chu chi dang hlak an ni bawk.

Prof Richard Lessells, University of KwaZulu-Natal, South Africa chuan, “He virus hian inkaichhawn a tiawlsam zual thei a, immune system-ah bu a khuar nghet zual thei bawk,” tiin a sawi.

Variant thenkhat te a landan hlauhawm zual mah se, a taka mihring khawih buai vak lo a awm thung. Beta variant te kha kumin kumtir lam khan khawvel tibuaitu niin a chhan chu immune system pumpelh thei a nih vang a ni a. Mahse, a tawpah chuan inkaichhawn awlsam zawk Delta chuan khawvel a tibuai ta zawk.

Prof Ravi Gupta, University of Cambridge chuan, “Beta variant kha immune pumpelhtu a ni ringawt, a bak a awm lo, Delta erawh darh awlsam niin immune system pumpelh theihna nei a ni bawk a, hei vang hian a hlauhawm zual a ni,” tiin a sawi.

Scientist-te chuan laboratory-ah zirchianna nei mekin hun rei lo te hnuah a nihna dik tak hriat theih beisei a ni a. Thutlukna la siam theih a nih lo chungin hlauhthawnna nasa tak erawh a siam mek thung.

South Africa-a Guateng province ah he variant thar kai 77 hmuhchhuah tawh niin Botswana-ah pali leh Hong Kong-ah South Africa tlawhtu pakhat atangin hmuhchhuah a ni bawk. Hei vang hian he variant hi khawvel hmun dangah pawh darh nasa thei viau tawha ngaihna a awm.

He variant hian standard test neihnaah quirky results (S-gene dropout tia hriat bawk) pe theiin hei vang hian genetic analysis nei kher lovin he variant hi chhui zui theih a ni dawn thung.

Gauteng-a hripui kai 90% te chuan he variant hi an kai thei tia sawi niin South Africa province tinah a darh thei tawh tiin sawi a ni bawk.

Mahse chu chuan he variant thar hi Delta aiin a darhchak dawn tihna a ni chuang lo va, vaccine lak atanga immune protector a pumpelh theih dawn leh dawn loh pawh hriat chian a la ni chuang lo.

He variant hian ram dang vaccine lak tamnaah darhchak theihna a nei dawn em tih pawh hriat chian theih a la ni lo zel bawk a. Variant thar hlauhawm taka ngaih a nih avangin mithiam ten zirchianna an nei mek tih zawng chu khawvelin a hriat theih rih a ni a. Zawhna tam tak awmin pandemic len lai chuan chhanna i neih vek hun i nghak thei lo tih a ni.

Germany, Italy leh Britain te chuan South Africa atangin khualzin ten an ram luh a khap nghal a. Hei bakah hian European Union chuan southern Africa atanga khualzin ten Europe khawmualpui an luh khap tumin rawtna a siam nghal bawk.

He South Africa a hmuhchhuah variant thar leng mek hlauhnain khawvel a tuam nghal a, ram hran hrante pawhin ruahmanna an siam zui nghal bawk.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy