‘Corruption do’ tih hi…

Corruption tih tawngkam hi kan pianpui tawng ang maia hman tlanglawn tawh a ni a, a awmzia pawh kan hre chiang viau tawh. Corruption hi thumal pakhat ‘rinawmlohna’ tih hian a khaikhawm tha ber mai awm e. Dik lo taka thil tih heng – thuneihna hman sual te, sum leh pai khawih chingpen te, hmanrua leh bungrua, a nihna tur ang lova hmante etc. hi ‘rinawmlohna’ rah vek a ni.
Eng vangin nge mi a rinawm loh? tih zawhna hi chhang dawn ta ila, system fel loh vang, tih leh, corruption pawi tih loh vang hrim hrim, tiin a chhan theih awm e.
System a fel loh na na na chuan dik lo taka thil tih mai theihna kawng (loopholes) a lo inhawng zau a, a tira mi rinawm takte pawhin a lo rei deuh hnuah ‘finfiah mai theih loh tur a ni bawk a..’ tia inthiam chawpin corruption-ah an inhnamhnawih leh mai thin.
System a fel lo emaw, a felfai viau emaw pawh ni se, corruption-a inhnamhnawih duh leh a tuma tum ngar ngar (system bawhchhiat duh) a awm theih bawk.
Mizoram hi corruption hluarna tia ualau taka sawi hlawh a ni tawh a. Mizorama corruption hluarna chhan hi eng ber nge ni ta ang? tih hi zawhna pawimawh tak a ni.
A chunga corruption a thlen theih chhan kawng hnih tarlanah te hian, ‘system fel loh vanga corruption’ nge nasa ang a, ‘corruption tum ngar ngar’ tih hi? Corruption do dawn chuan hengte hi kan survey a, kan zirchian a pawimawh hle dawn a ni.
Inthlan dawn apiang hian politician tam tak hian ‘a takin corruption kan do dawn’ an ti thla zen a, chuti chung chuan ‘corruption hluarna state’ nih kan bang chuang si lo.
Tun tum inthlanpui kan hmachhawn mekah pawh hian corruption chuan sawi a hlawh chho leh tan ta a. Kan politician-te hian corruption a thlen theih lohna tura loopholes hnawhphui dan lam hi mipui hnenah chiang fek fawkin han tlangzarh thin se, tu party corruption dona nge tha ber dawn tihte hi mipui hian buk tawn tur nei tal ila, chu chuan awmzia a nei thui deuh tawhin a rinawm. Corruption a bo chuan kan ramin hma a sawn ang a, a changkang mai dawn a. Corruption hi kan thanmawhbawk lian ber a ni si a.