Council of Churches hawng ta
Mizorama kohhrante inpumkhatna atana kohhran hrang hrang aiawhten ruahmanna an siam angin Council of Churches in Mizoram (CCM) chu October 26 & 27 khan Rorel leh inkhawmpui hmasa ber chu Mission Veng Presbyterian Kohhran biak in Aizawlah neih a ni.
Inrinni chawhnu dar 12.30 atangin Rorel Inkhawm neiin, CCM Rorel-ah hian kohhran pawl hrang hrang atangin palai 552 an tel. Inrinni zanah Palai lawmna inkhawm neih a ni a, kohhran hrang hrang aiawhte hnen atangin report nghaihthlak a ni.
Pathianni chawhma inkhawmah Council of Churches in Mizoram chu Mizoram Synod moderator (Mizoram Presbyterian Church – MPC) Rev Vanlalnghaka chuan a hawng a. Rev Dr H Remthanga’n CCM hruaitu thar lalutin Pathian hnenah tawngtaiin a hlan a. Sawrkar aiawhin Mizoram chief minister Lalduhoma, North East India Christian Council (NEICC) aiawhin secretary Rev. Ramengliana ten chibai bukna thu an sawi a. Pathianni chawhnu leh Pathianni zanah CCM Inkhawmpui neih chhunzawm a ni.
CCM hruaitu tur hi inruat fel a ni a. President – Rev Dr R Lalbiakliana (BCM), vice presidents – Rev B Zazawna Lai (LIKBK) leh Rev Lalrodinpuia LS Nghaling (IKK Bualpui NG), general secretary – Rev Dr Lalhmangaiha (MPC), joint secretary – Rev T Salaw (ECM), treasurer – Upa R Lalmalsawma (MPC), finance secretary – Rev Jesai L Neitham (EFCI) an ni.
Vawiin – October 28 zing dar 7.30 khan Aizawla CCM office lailawk chu CCM president thar RevDr R Lalbiakliana’n a hawng a. CCM office hi general secretary leh thawktuten an luah nghal ang.
Council of Churches in Mizoram hmanga kohhran inpumkhatna hi ‘conciliar unity’ anga kalpui tur a ni a. Kohhran hrang hrangte kan chin dan inang leh lungrualna atanga thawh ho tum a ni. Thurin leh chin dan (tradition) lama kan inan lohna ch dah tha in, kan rama mimal nun, khawtlang leh sawrkar thlenga inrelbawlna tih hmasawnna kawngah kohhranten hma kan lak theihna turin inpumkhatna hi kalpui tum a ni tih an lo sawi tawh a ni.
Tun dinhmunah Council of Churches in Mizoram-ah hian kohhran 8 – Mizoram Presbyterian Kohhran (MPC), Mizoram Baptist Kohhran (BCM), Evangelical Church of Maraland (ECM), Lairam Isua Krista Baptist Kohhran (LIKBK), Evangelical Free Church of India (EFCI), Isua Krista Kohhran Bualpui NG (IKK), Wesley Methodist Church Mizoram leh Independent Church of India (ICI) te an awm a ni. Pathiannia a hawnna inkhawmah hian sawm an nih angin Mizoram MLA engemawzat bakah Central YMA aiawh leh Mizoram Theologian Association aiawhte pawh an tel a ni.
Council of Churches hawng ta
