Court-in Health director hlui
leh engineer thiam loh chantir
Special Court (Prevention of Corruption Act) chuan cheng nuai 29 chuang tihchingpen thubuaiah Mizoram sawrkar hnuaia director hlui pakhat leh engineer pakhat chu thiam loh a chantir a. May 15-a hrem an nih dan tur a puan leh hma chuan jail-a dah turin a ti.
Sawrkar laipui Ministry of Health & Family Welfare hnuaia National Rural Health Mission-III Division-in kum 2007-a Civil Hospital Aizawl tih changtlunna tur sum, vaibelchhe 10 Mizoram State Health Society a pek tih chingpenna thubuai a ni a. Kum 2012 a Vigilance department-in CBI chhui tura a tih kal zel niin, cheng vaibelchhe 5.74 hman khawloh anga tarlan a ni. Hetihlaia NRHM mission director Dr N Palai leh Directorate of Health Services executive engineer Lalsangliana Chhakchhuak te chu mawhphurtu nia hriat an ni.
Civil Hospital Aizawl compound hung thatna tur a vaia Rs. 19,78,000 pekchhuah chu, a hming tumtu T Ruata, Republic Veng tih chu CBI hian an hmu zo loa, T Ruata hminga contract hna pek leh sawrkar sum tih chingpennaah hian Dr N Palai hi ama tan emaw mi tu emaw duhsak bik neiin sawrkar sum tichingpena puhna hi CBI hian finfiahah ngaiin PC Act 1988 leh sawrkar lehkha pawimawh tih dikloh luihna bakah lehkha pawimawh dikhlel hmang lui anga puhna angin section 471/477A of IPC hnuaiah thiam loh a chantir. He thilah hi chuan Lalsangliana Chhakchhuak hian inhnamhnawihna a nei lo tih an finfiah thung.
M/s Vulmawi Art Works neitu hminga cash memo siamin, spiral binding machine & VHSL folder leina man Rs. 2,56,350 hmangral anga bill siamnaah, a neitu hian engmah a hriat loh thu a sawi bakah CBI hian a inhnamhnawih ve na an hmu lo a, chutihlaiin M/s Vulmawi Art Works cash memo ruak (blank) chu Dr N Palai hian a neitu hnen atang hian a la thin tih a sawi a. He thilah pawh hian Dr N Palai chauh hi PC Act leh IPC hnuaiah thiam loh chantir a ni.
Puhna dang pakhat, Rs 7,12,469 tihchingpenna, JMT Architectural Services Zarkawt neitu chuan midang pakhat kaltlangin warehouse sakna tur drawing buaipuina manah hetihlaia Health Services EE Lalsangliana Chhakchhuak hnenah hian, Dr N Palai ruahman puina in a dawng tih finfiah a ni a, he thilah hi chuan an pahnih hian thiam loh chantir an ni.
He thila sum chingpen chhut chhuah tak hi a vaiin Rs. 29,48,819 a ni.
Court-in Health director hlui leh engineer thiam loh chantir
