Daily Newspaper

Covid-19: Dan zawm loh vangin BSF hrem

34

Aizawl, July 30 : Tun hnaiah Mizoramah central armed police force (CAPF) te’n Covid-19 natna an vei tih hriatchhuah a ni fo a, dan bawhchhiat vangin BSF hotu thenkhat chu hrem a ni nghe nghe.

Tun hnaiah Lunglei-ah police te’n BSF hotu panga an hrem a, hemi kaihhnawihah hian DC lamin Lungleiah hian damdawi dawr pakhat an khar mek bawk.

Lunglei bul Vanhne-a awm, 60th Battalion BSF hotu pangate chu Lunglei police te’n Mizoram (Containment and Prevention of Covid-19) Ordinance hmanga hremin pawisa an chawitir a, Lunglei-a damdawi dawr pakhat pawh BSF te’n dan an bawhchhiat chungchang vang hian DC-in a khar mek.

Thu dawn danin, May ni 26 khan home department-in Mizorama CAPF te hi lehkha pein, Covid-19 do nana dan an zawm tur te hriattir an ni a, Lunglei-a BSF te’n Covid-19 an vei tih hriatchhuah a nih hnuah, FIR bawhzuiin police te’n chhuiin, BSF hian dan an zawm lo tih finfiahin an hotute an hrem ta a ni.

Thu dawn danin, June thla tawpah khan Lunglei Civil Hospital-ah BSF mi pahnih an inentir a, an sample endik niin, an lo positive tih hriatchhuah a ni. Police te’n contact tracing tiin tun hnaia anni pahnih chetvelna an chhui a, pawnah te chhuakin mi dang nena inhnaihin an lo awm thin tih an hrechhuak a ni. An pahnih hian Vanhne camp-a awm an nih avangin, he camp-a mite chu an vaiin an sample laa endik a ni ta a, panga an lo positive tih hriatchhuah a ni leh. Positive lo thenkhat pawh a hnuah an positive leh bawk.

Positive hriatchhuah pakhat chu private clinic pakhatah a lo inentir tih hriatchhuah a ni a, Lunglei-a awm 131 Battalion BSF mi pakhat chu a awmna tur ni lo, 60th Battalion awmna (base camp), Vanhne-ah a lo awm ve tawp tih te hriatchhuah a ni bawk.

Police te’n an chhui ta zel a, BSF te hi civil mite zingah an kal thin tih te, Vanhne atanga hian Lunglei-a bazar-a kal an awm tih te hriatchhuah a ni ta zel a, hei vang hian tun hnaiah Lungleia veng 10 chuan pawn chhuah an khap hial. He thilah hian civil mi, mi 301 te swab sample laa endik a ni a, vanneihthlak takin an negative vek a ni.

FIR bawhzuia chhuitu Lunglei police te chuan BSF te hian Mizoram sorkarin Covid-19 do nana dan a siamte an zawm lo tih an chhuichhuak a, an chetvelna pawh district thuneitute hnenah an ‘report’ lo tih te an chhuichhuak bawk.

Police te’n BSF mi Covid-19 veite chetvelna an chhui hian, positive hriat thar inentirna ‘clinic’ pakhat chuan police-te hi thawhpui lovin, BSF positive hriatchhuahte zingah an hnena inentir an awm lo niin an sawi a, mahse inentir an awm ngei tih police te’n an hailang. Hemi chungchangah hian police te hian criminal case ziaklutin an bawhzui mek tih thu dawn a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy