Covid-19 hri vei pakhat awm mek

Covid-19 lakah thla ruk chuang Mizoram a him hnuah tun hnaiah he hri hi a rawn lang leh a, hri vei enkawl lai pakhat a awm.
Nikum November atang khan hri vei hriat thar an awm lo char char a, May ni 30 khan hriat thar pahnih an awm. June ni 4 khan pakhat a dam a, pakhat dang chu enkawl zui a ni.
Nikum khan hri vei hriatchhuah thar mi 73 an awm a, a hnuhnung ber chu October-a mi a ni. Hun engemaw chen Mizoram a him hnuah May thla tawpah hriatchhuah thar pahnih an awm leh a, naupang ve ve, natna dang vanga damdawi ina lut, Covid-19 an vei leh vei loh pawh fimkhur thua endik an ni.
Mizoramah Covid-19 enna hi ZMC-ah chauh a awm rih a, tun hnaia hriat thar pahnihte pawh hi ZMC-ah enkawl an ni.
Sample endik hi a awm ve deuh reng; May ni 29-ah pawh khan mi pahnih endik an ni a, hri an kai lo ve ve. Ni 31-ah mi paruk endik an ni leh a, an him vek. June ni 3-ah mi 13 endik an ni a, hri kai an awm lo. Ni 4–ah mi pahnih endik an ni leh a, an him ve ve.
Doctor-te chuan Covid-19 an khawvel hmun dang ang bawkin Mizoram pawh a chen chilh tawh a, chuvangin rawn lang leh tura ngaih a ni sa an ti a, tun hnaiah vei an awm leh pawh hi mak tih turah an ngai lo.
Tun hnaiah khawvel hmun thenkhatah Covid-19 vei an awm thar leh a, India ram hmun thenkhatah pawh nasa vak lovin a darh leh. Mizoram doctor-te chuan tun hnaiah Mizoramah hri vei hriat thar awm leh mah se hri a leng leh tihnaah an ngai lo.
Integrated Disease Surveillance Programme (IDSP) chhinchhiahnaa a lan danin, Mizoramah mi 2,39,637-in Covid-19 an vei tawh a, mi 734-in nunna an chan tawh.