Sawrkar thuchhuahin a tarlan danin, tun hnaiah Mizoramah Covid-19 natna kai thar mi pariat an awm leh tawh a. Covid-19 hi a la reh lo a, a khat tâwka rawn lanchhuah chang nei a ni. He natna hi inkaidarh awlsam tak leh fimkhur ngai tak a ni a, Covid-19 laka kan him theih nan theihtâwpa kan fimkhur tlan a tul hle, tiin sawrkar chuan invên dan tur mipui hnenah tun hnai khan hriattirna a tichhuak leh a.
Kan hriat angin, Covid-19 avangin kum hnih zet hna thawk thei lova inchhunga inkhung beh a ngai a nih kha. He natna thihpuitu pawh Mizoramah 734 an awm hman a, chawhrualin ni tin Covid-19 avanga thi pakhat zel ang a ni.
Covid-19 kan lo hmachhawn dan kha kan hre vek a, India ram pum huapa total lockdown puan a nih hmain Mizoram chuan kan lo puang diam tawh a nih kha. Total lockdown pawh kan zawm tha a, kan zawm tha mai ni lovin, kan hlau a, kan tih a ni ber. Ni tin eichawp zawngten an tuar zual a, chutih rualin, ‘sem sem dam dam..’ ti thin hnam kan nihna ze mawi tak a lo lang chhuak a, tawrhna phena malsawmna tih ang deuh khan, kha hrileng tihbaiawm tak khan Mizo hnam ze mawi leh tha a lanchhuahtir kan ti thei ang. A neiin a nei lote an ngaihsak a, food supply chain hmangin kan inpeizawn tel tel a. Thingtlang mipui lamin an neih zâwng huan thlai leh hnephnawlte khawpui mipui tan an rawn thawn lut chur chur a, khawpui mipui lamin an neih zâwng sum leh pai an thehchhuak ve bawk a. Rom sawrkarin Kristiante a tihduhdah laia Kristiante an inpumkhatna boruak ang kha a lo piang chhuak leh a ni ber awm e.
Tunah chuan, Covid-19 natna kum hnih zet tawn hriat nei tawh kan ni bawk a, he hrileng hi a lo dãl (dilute) ve deuh tawh bawk nen, Covid-19 zei zia kan man tawh a, fimkhur dan tur te pawh kan hre viau tawhin a rinawm.
Hetih rual hian, inkalpawhna a lo tha ta bawk a, tunhma aiin state dang mihring chi hrang hrang nen kan lo inpawlhsawp nasa lehzual ta bawk nen, he Covid-19 hi pung leh hluai thei a ni tih kan hriat a pawimawh hle. Tuna a rawn rik leh ret ret lai hi, fimkhur a ngaih zual lai tak a ni a, inkhuahkhirhna khauh tak hmachhawn leh mai thei kan nih avangin, khuahkhirhna khauhin nunphung a tih khaihlak nasat theih dan hretu vek kan ni a, tihdam ngaia awm hmain lo inven lawk a sawtzia pawh a hretu vek kan ni. A huhova inkhuahkhirhna hautak zet ang kha a thlen nawn tawh loh nan, mimal tinte hi kan lo inkhuahkhirh lawk a pawimawh dawn hle a ni.
COVID-19 leh keini…
