Daily Newspaper

Covid-19 Mizoram tan malsawmna

14

Lallunghnema
Charity Lodge
MB – 9862288182

Kumin 2020 ah hian khawvel nunphung chawk buai vektu Corona virus hrileng avangin mumang pawha kan man ngam loh ni 100 chuang fe kharkhip kan ni a. He inkharkhip avang hian nunphung a buai zo vek a. Industry leh sumdawnna a chawl thuap a, Damdawi in tih loh chu hmun tinreng khar a ni vek a. Zirna in pawh khar vek a ni a, hostel pawh khar a ni bawk. Sakhaw biakna inte pawhin awmzia a nei lo; programme zawng zawng a thisawn vek a ni. Pawisa hloh leh chan a nasa hle a. Sawrkar lu a hai a, mipui ngaihtuahna a buai tak zet. Thlarau lam nun chau lutuk tur venna atan mi thahnemngai ten T.V. kaltlangin Home Crusade min neihpui bawk. Mi tam zawk eizawnna tlabalin an awm a, vehbur an khawn lo chauh. Sawrkarin mipui retheih lutuk hlauvin thlaithar supply chain dinin hmun hrang hranga thlai tharte chu lei khawmin hmun hrang hrangah an sem chhuak. Thingtlang leh khawpui chhunga mite inhmangaihtawnna luangliam hmel hmuh theihin a awm a, thingtlang khaw hrang hranga miten khawpui veng hrang hranga mite chu an thlai thar an pe. Chumi chhan let nan chuan chung khawpui chhunga mite chuan an theih ang tawka lo tanpui let vein chawhmeh buhfai leh sum leh paiin lawmthu an lo sawi ve bawk. Mihring inhmangaihna Pathianin min pek chu a takin a lo lang chhuak ta a ni. Thilpek inchhan letna kawngpui ropui tak chu a ni chiang hle mai.

Thenawm rama miten hripui an lo put luh loh nan ramri tin maite chu khar a ni a. Mizo tlangval tlawmngai ten mahni hrehawm pawisa lovin, Zoram hi kan ram a ni, tiin ramri venhim hna an thawk ngawrh hle bawk. Sawrkarin Covid natna hripui leng vel dan nan leh tul dang atan sum tam tak a mamawh dawn tih an hriatin pawl hrang hrang, ram roreltute leh sawrkar hnathawkte, Kohhran pawl hrang hrangte leh mimal tam tham takin sawrkar zemah pawisa hlu tak an chhunglut ruih ruih bawk. Kil hrang hrang atanga sum thawh khawmte hi mi naran chhut thiam theih pawh a ni lova. Mi satliah chhui zawh rual a ni hek lo. Covid-19 do nan sum a lut tam hle, tih chu keini ang mi naran, huih hmawk hriattham chin chuan kan hre thiam pha kher lovang. Hlain, ‘A sang em a, ka phak lo a ni,’ a tih ang deuhin a tam em a, hmanna pawh a tam ngei ang, tul pawh a tam ngei bawk ang, tih a rinawm a. Pawisa hmanna tur pawh a tam hle ang a, mahse, han ti ve khanglang ila, sawrkar erawh a fimkhur hle a ngai a ni. Covid hripui do avanga retheihna khura tlu lut an awm mek laia work order lo inpek chhen pawh hi a nalh lo hle a. Inthlahrun nachang hre lo, sawrkara thiltithei tak an awm em ni? ka lo ti ve hial a ni.

Covid avanga kan tuarna hi malsawmnaa kan chantir loh chuan kan hmabak chu chhiatna a ni mai. He hun thim chhah tak kan tawn mek hian hun hlimawm tak min hmachhawn tir ngei tur a ni. Sawrkar pawh a insiamrem zel a tul dawn a ni. Sum tam tak hloh leh chan hi chan hlen tur kan ni em? Nasa zawka tan lak a ngai hle. Harh tharna kan chan a tul. Economic revolution leh Industrial reviolution a awm ngei ngei tur a ni. Ram danga awmte an lo kir a, sawrkarin dawmkan a tum tih kan hria. Heng ramdanga awm lo kir leh te hian leirem an lo rah ve theih nan Youth Commission Pu Vanlaltanpuia Chairman hovin hma an la mek tih thute han hriat hian a tlamuanthlak khawp mai. Hna hloh ho tundin an tum dan pawhin sawrkar hna kawk lovin, self employment lam a kawk reng a. Zofa thalai 1000 chuang zet zawt Zoram Economic Revolution an thlen thei ngei ang tih hi a rinawm em em a ni.

Tuna kan boruak tawn mek hi kan duhthlan a ni lova, châk avanga tawng kan ni hek lo. Hripuiin min tihchhiat loh nan sawrkarin min veng a, mipui kan boral loh nan sawrkarin sum tam tak sengin min hung mek a ni. Heng thil thleng hian rah tha a chhuah ngei tur a ni. Rah tha a chhuah dawn chuan thil thar a thleng tur a ni. Thil thar thleng tur chuan beih a ngai a, rilru ngaihtuahna thar kan nei tur a ni bawk. Sawi fo thin angin tun thleng hian state pawn lam, Assam leh Meghalaya te hi sa leh thlai, thei leh eitur chi hrang hrangah min la chawm mek a ni hi!

Mizoramah hian kut hnathawktute leh loneitute chuan tuna thlai kan ei mekte hi min pe thei. A tam zawk erawh state pawn lam atanga chawk luhte a ni. Alute leh Dailuahte hi kan chawhmeh rinpui te an ni. Mi tam zawkin Alu leh Dailuah kan ei. Heng chi hnihte tel lo chuan chaw kan ei thei ngai lo a chhâ a ni. Dailuah kan ramah kan ching thei lo a nih pawhin Alu tal hi chu kan tharchhuah tam a tul tak meuh. Shillong Alu ringawt a, kan nung ta fo reng maite hi zawng zahthlak a tling. Mizoramah Alu a tha duh hle. Mizoram chhak lamah a chin theih deuh vek a, heng North Vanlaiphai te, Lungkawlh te, Thingsai khua angah te hian Alu a tha duh hle. Mahse, thar alawi pawh kan nei ta meuh lo. A zahthlak e. Heng Apple, Dragon Fruit te hi thil manto a ni, a class pawh a sang. Mahse, Mizoram hian tih tham kan thar ve lo. Kan ngaisang a, lei kan thulh hek lo. Kan thar loh apiang kan ngaisang emaw tih tur a ni mek. Ngaihtuah tham a tling a ni.

Saah lah hian kan la intodelh lo hle mai bawk. Arsa, Vawksa leh Bawngsate hi Mizoramah kan la intodelh lo. Kawl bawngte, Shillong Vawksa rep te chu kan innghahna a ni fan. Heng saah tal te hi chuan intodelh thei khawpa hmalak a tul takzet zet a ni. Sawrkar leh mipui hian hun thim kan dai lai mek hian hun hlimawm kan hmachhawn theih nan kan thalaite hi hmalakpui thuai thuai teh se. Ram dang atanga lo thleng kan u leh naute sawrkar hian a chhawmdawl dawn rau rau a nih chuan helam hawi hian hma a lak pui a tul hle a ni. Ramdang pur tawh lo tur khawp leh thawn chhuak thei khawpa ranvulh lama hma kan lak loh chuan he Covid-19 hi kan tan anchhia a ni mai dawn tih hriat a tul tak zet tawh a. Economic Revolution kawng a inhawng tihna a lo ni ang a, he hripui hi anchhia ni tawh lovin malsawmna inthup pholêng a ni tawh ang.

Faina leh Thianghlimna Revolution pawh hi kan mamawh ngawih ngawih. Mizote hi kan la fai tawk lo hle. Kut sil uarte hi kan intihhmuh a va tul em! Hmai tuamna (Face mask) mawlh hi hripui awm tawh loh hnu thleng pawha kan intihhmuh tur chu a ni. Hmai tuamna hian nasa takin natna hrileng lakah min veng tih kan hriat bel tluk hian hriselna pawh a ni tel ve ngei turah i ngai ang u. Tlang hrileng laka min chhanhim theih rualin balhna lak ata min vengin faina kawng kan zawhna hmanrua tha tak a ni.
Chil chhak mai mai hi kan sim a tul hle. Aizawl Civil Hospital-ah hian tunhma khan mipui zawm tur thurawn an tarchhuah zingah, ‘I chil lem la, i hnap ak rawh,’ tih hi a tel a. Khawlaia chil chhak phurh phurh hi a tenawm piah lamah natna hri leng tur, tipunluntu a ni fo tih mithiam ten an sawi thin. Chil chhak hi bansan a hun tawh hle. I hnap pawh kha hnit mai mai suh. Ak mai rawh.
Coronavirus kan han hlauh vanglai tak tak kha chuan sawrkar thu a khauh poh leh kan zawm tha a ni mai a. |henawmte in takngial pawh kan rap ngam mang lo kha a ni a. Tunah ramdang atanga lo kaite atang chauhva hri darh nia hriat a nih chhoh tak hnu leh sawrkar pawhin Lockdown a thlah zalen hnu hian mipui kan phu mur mur a. Lockdown ni tho si chungin in lama lo inkharkhip hram hramte chu kan en dan a dang ta deuh em ni? tih tur khawpin pawn chhuak an tam em em a. Covid natna vei an pun tam poh leh kan zalen zawk niin a hriat theih hial! Sawrkar thuawihna hi malsawmna a ni. Sawrkar a khauh loh avanga lo khauh loh ve ngawt emaw lo nem ve ngawt hi kan tih tur pawh a ni lo. Chuvangin mipui hian thuawihna hi kan vawn reng a tul a ni. Covid awm loh hun thleng pawhin thuawih hi keima tan a ni tih hria ila, Sawrkar thu hi awih zel ila, chu chu Economic Revolution lamtluang a ni.

Mizoram siam tha tur hian tanrual hi namen lovin a tul hle. Inthlahdah hman kan ni ta lo hle. Ramdangin Intodelhna kawngah thui takin ke an pen tawh. Thlawhtheihna tumhmun tha tak an nei. Air port pakhat mai an nei lo. Keini pakhat chauh, Lengpui Airport kan nei hi zahna tham a tling. Kawng tinrengah kan hnufual tih hi pawm thlap mai ila, mahni nawmchenna leh duhamnate hi phum bovin, Economic Revolution lam kan hawi a tul. Eiru hman pawh kan ni tawh lo. Mizoram hi Gujarathi-ho ta a ni lo. Mizoram chu Mizote ta a ni. Mizoram a mualpho chuan Mizo mipui kan mualpho a ni mai. Mizoram a tlukchhiat chuan Mizo mipui mawh a ni. Hruaitute mawhphurhna a ni leh zual. Tun hi insiam thatna (reformation) hunah i ngai hmiah ang u. Covid-19 Mizoram tan, Mizo mipuite tan Malsawmna ni rawh se, tiin ka’n titawp thut teh ang.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy