Daily Newspaper

Covid-19: Sample result nghah lai thahnem

11

Tun hnaiah Covid-19 natna an vei em tih enfiah tura sample lak, a result nghah a tam a, zan li nghak tawh te pawh an awm.

Aizawla Covid-19 natna vei hriatchhuah tawh tam berna veng Venghnuai chuan mi 281 result an nghak a, chung zinga 132 chu September ni 14-a (sample) lak kha niin, a dang 149 chu Ningani-a lak kha a ni.

An veng task force hruaitute chuan an phun loh thu leh thuneitute nen an inbiak reng thu an sawi a, chutih rual chuan sample laknate tan chuan zan khat pawh a rei avangin, result hriat har vanga hrehawm ti chu an awm tih an sawi.

Venghnuai-ah hian positive hriatchhuah tawh mi 28 an awm a, anni aiin Bawngkawn-in result nghah lai an ngah. Bawngkawn hian mi 287-te result an nghak a, sample 103 chu Zirtawpni-a lak kha niin, a dang chu September ni 15 leh ni 16-a lak a ni. An task force hruaitute chuan result hi nghak rei an inti hran lo tih an sawi a, anni aia nghak rei an awm tih an hriat thu leh sample lak a tam avangin thawktute tan pawh a hautak ang tih an hriatthiampui thu an sawi.

Venghnuai ang bawkin Electric Veng pawhin September ni 14-a sample lak result nghah an nei a, anni hian sample 57 vel result an nghak nia hriat a ni. Tuikhuahtlang-in September ni 14-a sample lak result an nghak bawk. Tuikhuahtlang hian sample 130 vel result an nghak a, a tam zawk 112 chu September ni 14-a lak a ni.

September ni 14 hmaa mi chu result nghah lai a awm lo nia hriat a ni.

Zemabawk-in sample 180 result an nghak a, Ningani-a lak 20 leh September ni 15 leh ni 16-a lakte a ni.

Health department lam chuan tun hnaiah sample lak a tam avangin result hi nghah deuh a ngai tih an sawi a, thawktute’n an thawk char char a, theihtawp an chhuah tih an sawi.

(THE AIZAWL POST – Tualchhung)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy