Daily Newspaper

Covid-19 vaccine thlen huna pekchhuah dan tur rel

10

Covid-19 hri danna siam mek, India ram state hrang hranga semchhuah tura ruahman chu, a taka kalpui theih huna a semchhuah leh dan tur rel lawkin district hrang hrangah hemi ngaihtuah tur bika ruatte Zirtawpni khan an thukhawm.

Aizawl District Level Task Force on Covid-19 Vaccination chu an chairman, bawrhsap R. Lalramnghaka kaihhruaiin an thu a. Covid-19 vaccine a lo thlen huna Aizawl district-a pekchhuah dan turte, doctor, nurse leh medical staff-ten inpuahchahna an kalpui tawh chin bakah mawhphurhna leh chanvo insem dante thlirlawk a. Vaccine thlen theih hun tur sawichian theih ni lo mah se, a lo thleng hnai tawh tura beisei a ni tih sawi niiin, ruahmanna awmsa ang chuan healthcare worker zingah pawh damlo enkawltute, sample latute leh Covid volunteer-ten an dawng hmasa dawn tih sawi a ni.

Vaccine dawng hmasa tura thlanchhuahte list hi dahluh (upload) vek a ni tawh a. Healthcare worker-te dawtah frontline worker leh mamawh zuala mithiamten an ngaihten dawng leh tura ruahman phawt a ni.

Serchhip DLTF on Covid19 Vaccination chu an chairman, bawrhsap Kumar Abhishek hoin an thukhawm a. Vaccine pek hmasak tur ruahmanna te, vaccine sem a nih huna mamawh turte sawi ho a ni. Bawrhsap chuan vaccine phurh kualna tur, a dahna tur, thawktute a training pek leh mamawh dang awm theite ngaihtuah lawk a tul tih a sawi.

Thutkhawma report danin, Serchhip district-ah vaccine dah lailawk theihna (facilities) hospital leh PHC 10 an awm a, heng zing ami – Mercy Private Hospital tih loh chuan a phurhsawnna tur bawm an nei vek a ni. Vaccine pekchhuah theihna centre 35 a awm a, District Hospital-ah a chhekkhawla (District Vaccine Store) siam a ni.

Lawngtlaiah chuan District Task Force Immunisation-in an chairman, bawrhsap Dr Andrew H. Vanlaldika hoin Covid hri danna peihfel huna hriselna lama thawktute hnena hri danna pek hmasak dan tur an ruahman. Thutkhawma report danin, vaccine hi 2021 January tawp lamah chuan pekchhuah theih beisei a ni a, health care worker – doctor, nurse, health worker, ASHA leh anganwadi worker & helper-te pek hmasak tura ruahman a ni a, thawktute hming pawh lakkhawm a, thehluh tawh niin, Mizoram chu India rama a tizo hmasa pawl a nih thu sawi a ni.

Lunglei DLTF on Covid-19 chu an chairman, bawrhsap V. Lalsangliana kaihhruaiin an thukhawm. An district-ah hri a darh zel lohna tura hmalak tulte sawi ho nghalin, Covid-19 Testing Centre tur chungchang leh Krismas leh kumthar vuakveta duty dan tur pawh rel a ni. Covid-19 volunteer-te chungah DLTF chuan lawmthu sawiin an donation dawn atangin Krismas pual lawmman pek nise tih an rel. Lungleia Covid-19 Testing Centre hman mek chu a hmunhma a that tawkloh avangin hmun dang zawn nise an ti a, Lunglei khawpui chhunga hmun remchang engemawzat sawilan niin DC, CMO leh member dangten an hmunah kala an enfiah hnuah Centre thar hi ruatfel tura tih a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy