Daily Newspaper

Covid-19 vanga nunna chan 600,000 tling tawh

51

Khawvel pumah Covid-19 kai darkr 24 chhungin 260,000 lai awmin pandemic intan atanga nikhat thil thua inkaichhawn tam ber a nih thu WHO chuan a tarlang.

WHO chuan tun anga nikhata kai hmuhchhuah tam a la awm loh thu sawiin kai tam ber berna chu US, Brazil, India leh South Africa te a ni.

Covid-19 avanga nunna chan pawh darkar 24 chhungin 7,360 ah kai chho dawrh bawkin 10 May hnua nikhata nunna chan tam ber a ni zui bawk.

Tihian khawvel pumah coronavirus kai maktaduai 14 an tling tawh am nunna chan 600,000 an tling tawh bawk niin US a inbun Johns Hopkins University te chuan an sawi.

US-ah eng nge thleng?
US state hrang hrangah a bik takin chhim lam state-ah te virus kai thar an pung nasa hle a, heng hmun te hi lockdown hreh tak leh hmaikawr vuah hreh tak te tamna hmun niin a bikin Florisa, Texas leh Arizona-ah te a nasa zual bawk.

Florida chu US-ah epicentre ni mekin he state-ah hian kaithar darkar 24 chhungin 10,000 chuang an awm a, nunna chan 90 an tling bawk a, a pumpuiah virus kai 337,000 leh nunna chan 5,000 an tling tawh a ni.

State-a damdawi in hrang hrangte chu luahkhah a nih tawh avangin damlo pawm thei dinhmunah pawh an ding tawh lo bawk a.

US-ah bik hian virus leng tihtawp a nih theih nana hmalakna hmaikawr vuah chungchangte pawh politics lama her a ni ta zel bawk.

US’s top infectious disease expert Dr Anthony Fauci chuan state leader te chu mipui tena hmaikawr an vuah theih nan na taka chetla turin a ngen a, hetih lai hian president Trump thung chuan national level a hmaikar vuah vek tur tia thupek siam a duh lo thung.

Covid-19 kai tam zualna ram?
Coronavirus leng chungchanga politics boruak nasa tak awmna Brazil-ah chuan Covid-19 kai an pung belh zel a, WHO-in Brazil-ah inkaichhawn a nasat lutuk tawh loh an rin thu an sawi chungin inkaichhawn a la nasa zual zel a ni.

Scientist te chuan India pawh a vanglai la thleng lovah ngaiin tichung chuan khawvel pumah virus kai neih tam lamah pathumna a ni der tawh a. Mumbai leh Bangalore te ang damdawi in te chu damloin an khat tawh a ni.

Kar kalta Inrinni khan India ramah darkar 24 chhungin kai thar 34,884 an awm a, nunna chan 671 an awm bawk.

South Africa chu khawvela virus inkaichhawn tamna ber zingah tel bawkin Africa khawmualpuia virus kai nei ngah ber a ni mek bawk.

Europe bikah?
Western European ram te chuan virus leng darh zel tur an dang thawkhat thei tawh a, ramri te leh sumdawnna te pawh an hawng tan tawh zawk thung.

Mahse, Spain-ah huan hmun thenkhatah inkaichhawn nasatna la awm thungin a bik takin north-eastern Catalonia region-ah a nasa zual bawk a. Barcelona, La Noguera leh El Segria khawpuia cheng te chu pawn chhuak lova an chenna In a ni 15 inkhung tura thupek an ni.

Hei bakah hian mipui punkhawmna emaw mi 10 aia tam punkhawmna chi reng reng khap niin nursing home tlawh khap a ni a, gym leh nightclub te pawh khar a ni bawk.

Spain hian kar li kalta khan national lockdown a phelh chauh a, economy tih nun nana hmalakna kalpui tan a tum chiah lai a ni a.

Barcelona khawpui chu a reh ruai a, mi thenkhat erawh chuan inkharkhip bawhchhiain an chenna In pahnihna Barcelona khawpui pawn panin an inkhalh chhuak thung.

Spain-a virus kai an pun thar leh tak avang hian a thenawm France chuan ramri kharphui a tum bawk a, France ram ri hi 21 June khan hawn chauh a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy