Daily Newspaper

Covid-19: +ve tamna vengah -ve

12

Hrileng karah chanchin lawmawm lam sawi tur a awm zel a, vanneihthlak takin Mizorama Covid-19 natna veite’n hma an sawn thin; Aizawla he hri kai an tamna vengah pawh chu chu a hmuh theih.

Hrilengin a tihbuai nasat Ramhlun South pawh an fihlim rih a, an veng mi hri kai hriatchhuah tawh mi pakuate’n damdawi in an chhuahsan vek tawh.

Ramhlun South hi containment zone-a puan an ni a, September ni 5-ah hei hi hlih a ni. A tuk ni 6-ah an veng mi hri kaite’n damdawi in an chhuahsan kim.

He vengah hian mi 500 chuang ‘swab sample’ lak a ni tawh a, an veng chhungah quarantine centre 10 a awm bawk. Chung centre-a mite nen phei chuan he veng atanga sample lak zat hi a tam tham tawh hle.

Anni rual vela containment zone-a puan Zemabawk lam pawhin chanchin lawmawm an nei a, an veng mi hri kai pariatte zinga pathum an dam fel tawh.

Aizawl veng lian Zemabawk hi local council-a voter tam berna an ni a, a zau lamah pawh a zau. September ni 2-5 chhung khan containment zone an ni a, sample 600 thuak an lak tawh bakah 158 vel lak a la ngai. August ni 28-ah mi pali an positive tih hriatchhuah a ni a, chumi hnuah mi dang pali hriat belh an ni. Vanneihthlak takin hri kai thar an awm belh rih lo.

Hri kai 17 awmna Melriat pawhin chanchin lawmawm an nei; mi pasarih an dam fel tawh a, mi dang pawh damdawi in chhuahsan thei thuai tura beisei an ni.

Melriat-ah hian swab sample pawh 300 vel lak a ni tawh. A tir lama hriat chhuah mi 17 bak hri kai hriatchhuah an awm rih lo.

Chaltlang Lily Vengah pawh August ni 21 hnu-ah hri kai hriatchhuah an awm rih lo. He vengah hian hri kai hi mi 21 an awm tawh a, August ni 10 leh 21 inkarah khan mi 18 hriatchhuah an ni. Sample 400 dawn lak a ni tawh a, result nghah lai 65 vel an nei.

Lily Veng hi hriat theih chinah Venghnuai tih lohvah chuan hri kai an tam berna a ni a, hriatchhuah tawh mi 21 zingah hian vanneihthlak takin mi 10 chu an dam fel tawh.

Hri kai an tam berna Venghnuai-ah chuan mi 28-in hri an kai tawh a, sample 297 lak a nih hnu-ah Thawhtanni khan sample hi 128 vel lak leh tura tih a ni.

YMA leh kohhran hmunhma Convid Care Centre atana thawh hmasa ber veng Tuikhuahtlang-ah mi 13-in hri an kai tawh a, an zingah hian task force hruaitu pali an awm. Tuikhuahtlang mite hi tun hnai kar hnih vel chhunga hriatchhuah an ni.

+ve tamna hmunte
# Venghnuai-ah +ve 28 an awm
# Chaltlang Lily Veng-ah +ve 21an awm
# Melriat-ah +ve 17 an awm
# Tuikhuahtlang-ah +ve 13 an awm
# Ramhlun South-ah +ve 9 an awm
# Zemabawk-ah +ve 8 an awm

(THE AIZAWL POST – Tualchhung)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy