Covid-19 hrileng nasa tak kha a awm tawh lo a, mahse hri vei hriat thar hi chu an awm zeuh zeuh. Tun hnaiah pawh hriat thar an awm leh zeuh zeuh a, kuminah pawh an awm nual tawh.
Integrated Disease Surveillance Programme (IDSP)-in an chhinchhiah danin, kuminah Mizoramah Covid-19 vei hriat chhuah mi 38 an awm tawh.
2025-ah khan mi 40-in hri hi an vei a, kuminah thla li chhunga vei zatin a pha thuak tawh. Mahse hei hi hri a leng leh tihna a ni lo, mithiamte chuan an ti.
Thu dawn danin, kumina hri vei hriat tharte hi Aizawl district mi vek an ni a, a tam ber chu naupang an ni. Naupang, hri danna la la lo an ni tlangpui tih thu dawn a ni.
Kum upa lam pawh an awm a, natna dang nei an ni tlangpui tih thu dawn a ni. Kumina hriat chhuahte hi natna dang vanga enkawl, enfiahna lamah Covid-19 an vei tih hriat thar an ni hlawm tih thu dawn a ni bawk.
Kumina hri vei hriat chhuah hnuhnun berte chu April ni 29-a mite an ni a, hemi ni hian mi panga endik niin, pathumin an lo vei a ni. April ni 30-ah khan hri vei enkawl mek mi 10 an awm.
Mithiamte chuan khawvel ram dang ang bawkin Mizoram pawh covid hian a awm chilh tawh a, chuvangin hri vei hriat thar hi chu an awm tura ngaih a ni sa tih an sawi.
Nikum hmasa lam atangin hri hi a nasa tawh lo a, 2024-a hri vei zat kha 73 niin, 2025-a vei zat kha 40 a ni. Kumin hian March thla hnuah hri vei hi an awm leh a ni.
IDSP-in an chhinchhiah danin, 2020 atanga kumin April ni 30 thlengin Mizoramah hri vei hi mi 2,39,713 an awm tawh a, vanduaithlak takin mi 734-in an thihpui.
Covid-19 vei awm leh zeuh zeuh
