Daily Newspaper

Covid Centre-a thawk tur 200 chuang mamawhna thlen

29

Covid kaite enkawl hmun ruahman sa leh siamtharah a tlem berah mi 220 tal mamawh belhna chu sawrkar thuneitute hnenah thlen tum a ni a, Zoram Medical College-a nurse indaihlohna pawh thlen phuhruk thuai a nih theih nan bawhzui tum a ni.

Nilaini khan Health minister Dr R. Lalthangliana hoin Dedicated COVID Hospital (DCH) – Zoram Medical College harsatna tawh leh Covid kaite enkawltu volunteer – frontline workers indaihlohna chu a kaihhnawih official-ten an sawi ho a. Zoram Medical College director Dr. John Zohmingthanga sawi danin, Covid-19 thawh hnihna ZMC-a damlo enkawl ngai an pun nasat avangin thawktu, a bikin volunteer nurse an lak belh a, heng zinga 45 chu an exam a hnaih tawh avangin an chawlh a ngai dawn a. Naupangte enkawlna tur ward peihfel a nih chuan thawktu tur nurse lak a ngaih belh dawn a, nurse bakah thawktu dang, medical attendant chi hrang hrang indaih lohna a nasa tih a sawi.

ZMC-a Covid-19 hri kai damlote enkawlna khum (ICU telin) awm mekah tunah hian damlo 310 an awm a, an zinga enkawl ngai zualte awmpuitu mi 82 awmin nausen pianghlim 12 an awm a, an vai hian mi 404 an ni. Hetihrual hian ZMC khum indaih lohna phuhru tura ruahman, damlo serious vak lo enkawl uluk la ngaite dahna tura tih MRD DCHC MINECO, khum 50 awmna pawh luah khah vek a ni bawk.

ZMC director report danin, kumin June khan ZMC-ah nau piang 35 an awm a, an zinga 15 chu enkawl uluk zui ngai (neo-natal care) mamawh an ni. Tun thla kal mek July-ah vawiin thlengin nau piang 50 an awm a, an zinga 30 chu enkawl uluk zui ngai mamawh an ni. Covid-19 thawh thumna lo thleng tur atana inbuatsaihna, naupangte enkawlna tur bik HDC/ NICU/ SICU pawh theihtawp chhuahin inbuatsaihna an kalpui a, LG Company-in air conditioner an bun bakah oxygen pipeline siamna tur leh thil pawimawh dang tihna tur chu TATA Trust atangin sum an hmu dawn bawk a ni.

District tina Dedicated COVID Health Centre (DCHC) leh Aizawla DCHC thar pahnih ruahman – Kulikawn Hospital leh Mualpuia Sports Council building-ah thawktu chi hrang hrang a tlem berah 220 vel mamawh belh a ni dawn tih he thutkhawmah hian sawi a ni a. Specialist doctor, MBBS, staff nurse, lab technician leh thawktu dang engemawzat mamawh belh an ni. ZMC-a volunteer nurse chawl tate thlaktu tur pawh a rang thei ang bera tihfel a tul thu sawi a ni.

Heng mamawhnate hi a tul anga sawrkara thuneitute hnenah thlen a, tihhlawhtlin thuai a pawimawh thu sawi a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy