Daily Newspaper

Covid free district thar Khawzawl leh Serchhip

7

Serchhip leh Khawzawl district-a Covid-19 kai
enkawlte chu an dam tawh a, Serchhip amite hian inenkawlna hmun an chhuahsan tawh a; Khawzawl amite hi an negative tih finfiah ni tawh mah se, enkawlna hmun an la chhuahsan lo thung.
Serchhip Dedicated Covid Health Centre (DCHC) a enkawl mi pahnih, nufa chu an swab sample tum hnih endikah an negative tawh avangin dama puan an ni a, Ningani khan enkawlna hmun atanga chhuahtir an ni. An rual hian Serchhip district mi tho, ZMC-a enkawl leh ZMC-in an chhuahtir tawh, in lama inenkawl zui aia DCHC lama dah rih pawh chhuahtir a ni bawk. Heti hian an district-a Covid19 positive pathumte chu dam takin an chhuak a ni.
Serchhip district-ah swab sample 466 endik tawh niin result hriat vek a ni tawh a. Sample lak hmabak 39 a la awm. Tunah hian home quarantine 28 leh quarantine centre-a awm 27 an la awm.
Khawzawl district mi Covid-19 positive, Khawzawl damdawi in Isolation Ward-a enkawl mi pahnih chu sample test thar berah an negative a ni.
Khawzawl damdawi in hotute sawi danin, Covid-19 kai dam ta te hi ni thum chhung an dinhmun an enthla rih dawn a, ni thum hnuah harsatna dang a awm anih loh chuan an chhuahtir dawn a ni.
Khawzawl district-ah hian state dang atanga haw mi 286 zingah mi 3-in Covid an kai tih hmuhchhuah a ni a, an zinga pakhat hi a dam hnuah June khan enkawlna hmun a chhuahsan tawh a, midang pahnihte pawh an sample test a negative ve leh ta a ni.
Lunglei district-a Covid-19 kai enkawl dam tawh pakhat pawhin nimin khan enkawlna hmun a chhuahsan a. Heti hian Lunglei district-ah Covid19 kai enkawl lai pakhat chauh a awm tawh a ni.
Hetihlai hian July 1 swab sample test result chhuak zingah positive hmuh a ni loa, vei mek 26 awmin Covid kai hmuhchhuah 160 atangin mi 134 chu an negative tawh a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy