Daily Newspaper

Covid hmuh lohna district hnenah nuai khat pe

16

Covid hrilen tirh atanga tun thlenga he hri kai pakhatmah an la awm ve lohna Hnahthial district hnenah Health minister Dr R Lalthangliana’n lawmman atan cheng nuai khat a hlan.

South Tuipui bialtu MLA ni bawk Dr R Lalthangliana hian Inrinni khan Hnahthial a tlawh a. Sports minister Robert Romawia Royte nen Hnahthiala infiamna hmunhma ruahmante endunin hma lak zel dan turte an sawi ho.
Hemi hnu hian district chhunga primary health centres viltu medical officer-te nen an thukhawm a. Health minister chuan Mizoram district 11 zinga Covid19 positive la awm lohna district awmchhun Hnahthial district-a hrileng dona kawnga rim taka hnathawktute chungah lawmthu sawiin, ‘Covid19 free district’ an nih lawmpui nan cheng nuai 1 a hlan. Hrileng do nana hmun ruka police duty mekte hnenah thilpek a pek bakah an district chhunga PHC hrang hrangte hnenah hmanrua a hlan.

Hnahthiala hun a hman zawh hian Dr. R. Lalthangliana hian Serchhipah NGO Coordinaiton Committee ten Serchhip damdawi ina surgeon Dr. Lalruatliana Pachuau dah thar a nih avanga lawmthu sawina lehkha leh pangpar an lo hlan a. District bawrhsap Kumar Abhishek kaihhruaiin district level task force, district chhunga PHC medical officer-te leh midangte nen an thukhawm.ni.

Thla 4 chhung rim taka Covid19 leng do hna state-in a thawh chhunga thawktute thawhrimnaa lawmthu sawia Serchhip tlawh a ni tih Health minister hian a sawi.

“Chief minister tha leh inpe tak kan neih vangte, kohhran, tlawmngai pawl leh mimal tam takten tha taka sawrkar an thawhpui zel vangte, mipuiten sawrkar thu tha taka an zawm thin vangtein Covid19 dona kawngah fak tlakin Mizoram kan awm a. Vawiin thlengin state chhungah nunna chan kan la awm loa, a kai kan neihte an dam chho zel bawk a. A lawmawm em a ni,” a ti.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy