Daily Newspaper

Covid-in Mizoram sum dinhmun a nghawng thu CM-in sawi

34

Aizawl, September 4 :  Chief minister Zoramthanga chuan Covid-19 hrilengin khawvel hmun dangte ang bawkin Mizoram a nghawng a, Mizoram sum dinhmun a that loh phah tih a sawi.

Covid hrilen vangin sorkar laipui atanga sum hmuh a tlahniam tih a sawi a, Mizoramin pawisa a hmuh tur zat a hmuh loh phah thu a sawi. Mahse sorkarin a theih ang angin development hnathawh a tum tih a sawi bawk.

Session tawp ni, Ningani khan chief minister Zoramthanga, finance changtu hian Mizoram Fiscal Responsibility and Budget Management (Amendment) Bill, 2020 a pulut a, sawihona hmawr a bawknaah Covid vangin Mizoram sum hmuh a tlem phah tih hi a sawi a ni.

Zorama chuan he bill hi sorkarin langtlang leh hmuh mila sum a hman theihna tura tih a nih thu leh sorkar laipui ruahmanna, tih danphung pangngaia state-in a lo pawm ve tur a nih thu a sawi.

Sawihonaah member te’n he bill hi tha an tih thu an sawi a, chutih rualin eptu lam chuan Mizoram sorkar chu sum hman kawnga hlawhchhamah puhin, hei hi Mizoram sum dinhmunin a tuar tiin an sawi. Serchhip bialtu Lalduhoma chuan sorkar liam ta a fak a, sorkar liam taa finance minister Lalsawta fak bawk. A thlaktu sorkar chu sum enkawl thiam lo a tih thu leh an sorkar hmasakah pawh sum enkawl thiam lovah a puh.
Eptu pawl lamin MNF sorkar hmasak laia mi, “peace bonus” leh BAFFACOS sum chungchangte an sawi bawk.
Sawihona hmawrbawkin Zorama’n member-te thil sawi a sawifiah a, sum enkawl kawngah insawiselna tur a awm ang tih a rin thu a sawi a, mahse a chhan leh a vang, a hun lai dinhmun (circumstance) hriat tel a tul tiin a sawi.

1998-a an party an sorkar khan sum lamah an mangang tih a sawi a, sorkar laipuiah “peace bonus” tih hming phuahchawpin sum an dil a, a theih loh thua an lo chhan hnuah cheng vaibelchhe 182 chuang an hmu tih a sawi. Cheng vaibelchhe 100 te an hmuh tlin chuan a lawmawm ang tia an ngaihtuah laia chutiang zat an hmu chu an lawm hle tih a sawi a, chu chuan a chhawk ta nia sawiin, “Hmu lo ila chu a har ngawt ang,” tiin sum hi hmu lo se chu sorkar tan a buaithlak hle ang tih a sawi.

Chumi hnuah mautam tam do nan BAFFACOS hming phuahin sum an dil leh a, a vaibelchhe tel an hmu leh tih a sawi a, miin BAFFACOS hi an ngaisang emaw ngaisang lo emaw pawh ni se, anni chu an lawm tih sawiin, sorkar hnathawk thla khata cheng sing hlawh tling lote telin mipui hnenah thla ruk chhung buhfai a thlawnin an pe thei tih a sawi a, “Keini chuan kan chhuang khawp, kan lawm khawp mai,” a ti.

An sorkar hmasak lai chanchin a sawi zawhah an dawta sorkar te chungchang a sawi leh a, 13th Finance Commission-in sorkar laipui atanga state-in tax share a neih a tihhniam avangin Congress sorkar term hmasa khan harsatna an tawk niin a sawi. 14th Finance Commission-in chu chu a pun a, 32% atangin 42% velah a pun tih sawiin, chu chu Congress sorkar term hnihnain an chhawr tiin a sawi.

“Kan Congress unaute hun hnuhnung lampang kha, an sum dinhmun pawh a tha a, tin, Pu Sawta pawh a fel, mi tha, mithiam a ni. An dinhmun kha a tha,” tiin a sawi.

“Keini kan lo kal a,” tiin sorkarna an chan ve leh thu a sawi a, 7th Pay Commission rawtna anga sorkar hnathawk hlawh pek a ngai tih te, Finance Commission tharin an sum hmuh tur cheng vaibelchhe 820 chuangin a tihniam tih te a sawi a, “India finance dinhmun tlakhniam vang,” a ti. “A dil belhna pawh, lehkha pawh ka ziak tam. Mahse ka hlawhtling bik lo,” a ti bawk.
“Chuta tang chuan kan han tan chho ta a, chutih nak alai chuan Covid a lo thleng ta a,” Zorama chuan a ti a, sorkar laipuiin ni danga a pek ang zat a pe thei ta lo a, development ni lovin damkhawchhuahna tur zawk buaipui a ngai tiin a sawi.

Sorkar laipuiin state hnenah a hmaa a pek ang zat a pek theih tak loh avangin dan pawh siamthat a ngai a, leiba leh a rulhna chungchanga dan hman laite siamthat a ngaih avangin Mizoram Fiscal Responsibility and Budget Management (Amendment) Bill, 2020 pawh putluh a ngai tiin a sawi.

“Khawvelin Covid avanga, India ramin, Mizoramin harsatna namen lo kan tawh tak avangin hei hi vawiinah hian kan pass a ngai ta a ni. Chu chu finance minister fel vang a ni lo a, a fel loh vang pawh a ni lo a. A bul berah chuan Covid vang a ni ringawt mai a ni,” Zorama chuan a ti.

Sum hmuh te tlahniam mah se a theih ang angin development hna chu sorkarin thawh a tum niin a sawi a, “A tlin chin leh kan theih ang chin chuan kan han kal fat fat a,” a ti a, sorkar laipuiah hian project te an thehlut reng tho tih te a sawi.

Mizoram Fiscal Responsibility and Budget Management (Amendment) Bill, 2020 House chuan lungrual takin a pass a ni.

(THE AIZAWL POST – Tualchhung)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy