Daily Newspaper

Covid kai vanga Tokyo pan thei lo Gauff

18

Tokyo Games tennis inelna hmachhawn thei lo tur a hmei-a-pain player hraw kan hre nual tawh a, a hnaivaiberah American Coco Gauff kan hmu leh a, Pathianni khan mihang tleirawl kum 17 mi hian Covid-19 test-a a positive avangin kan hma lawk Tokyo Olympics-ah a inlan thei dawn lo tih a nemnghet ve leh.

Gauff hi Japan ram infiamna kutpui lianah inlan thei chu ni se kum 2000 hnu lama Olympic tennis player naupangber ni thei tur a ni a, mahse, Tokyo Games atanga world top player inhnukdawk engemawzat zinga rinluh a ni ve leh chawpchilh ta a ni.

Singles leh doubles competition hmachhawn tura US lamin an thlan fel tawh world number 25 Gauff hian Twitter kaltlangin Covid test-a a positive thu hi puangin, Tokyo khawpuia Olympic Games a hmachhawn theih loh tur thu chu lungngai takin a puan a tul ta tih a sawi a, Olympic-a USA ai awhtu nih chu a duhthusam a nih thu leh a hmalam hunah ram tana inlanna hun remchang dang a neih ngei a beisei thu a tarlang tel.

Hripui avanga kumkhata sawn tlai Tokyo Games hmachhawn tura Tokyo a pan dawn tepah Australian tennis player Alex de Minaur pawh test-ah a positive tih hmuhchhuah a lo ni tawh bawk a; tennis lamah hian player hraw tak takin Olympic inelna an hma-chhawn dawn lo a, chu’ng zingah chuan Rafael Nadal, Roger Federer, Serena Williams, Simona Halep, Dominic Thiem, Stan Wawrinka leh Nick Kyrgios telin, kumin Grand Slam tournament hmasa pathuma champion fai vek Novak Djokovic erawh Serbia ram tan a inlan dawn thung.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy