Daily Newspaper

Covid kaihhnawiha nunna chan 150 tling tawh

9

Mizoramah Covid kaihhnawiha nunna chan mi 150 an tling ta a, heng zinga 55 hi kumin July-a thi an ni.

Health department chhinchhiah danin, 2021 August 1 tlai dar 5.00 thleng khan Mizoramah Covid-19 kaihhnawiha nunna chan mi 150 an awm tawh a, kumin July kha thla khat chhunga nunna chan an tam ber niin, 55 an awm. August 1- tlai dar thleng hian pahnih an hman bawk.

Chhinchhiah chinah, 2020 March-a Mizoram-a Covid-19 a luh atangin, a thawhkhatah nikum Octiober 28 kha he hri kaihhnawiha Mizoram chhunga nunna chan tanna niin, a thawh khatna bikah hian mi 11 an thi a ni. Covid thawh hnihna, kumin April atanga chhiar tanah, August 1 tlai dar 5.00 thleng hian mi 139 in nunna an chan tawh a ni.

The Aizawl Post-a Covid kaihhnawiha nunna chan tarlan tawh chin zinga la tel lo, July 30 tlai dar 5.46 khan Thangkhumi (94), chu a chenna in Bethlehem Vengah a thi a. Chhungkuaa quarantine lai niin, a boral hnu hian a sample endik a ni a, Covid-19 a kai tih hriatchhuah a ni.

July 31 zing dar 1.15 khan Zionthanga (75), Khatla East chu ZMC-ah Covid kaihhnawihin a thi a, July 29 khan hri a kai tih hriatchhuah niin, natna nei sa a nih avangin hemi ni hian ZMC-a dahluh nghal a ni.

July 31 zing dar 7.30 khan Laltanliana (70), Rengtekawn Kolasib chu ZMC-ah Covid kaihhnawihin a thi a, a ni hi July 15 khan hri a kai tih hriatchhuah niin hemi ni hian ZMC-a dahluh nghal a ni. Hemi ni zing dar 9.15 khan Covid19 do kawnga volunteer Claudia Zosangpuii (25), Dawrpui chu a thi a, thihchhanah lungphuchawl tih a ni. A ni hi Dawrpui Multipurpose Centre-a Covid-19 vaccine peknaa duty (volunteer) niin, July 29 atangin a taksaah harsatna a nei a, Covid symptom nia ngaih theih ni mah se, a sample endiknaah a negative thung a, July 31 zing khan lungphuchawlin a thi. Chawhma dar 10.00 khan Neihkimi (75), Ramthar Veng Aizawl chu ZMC-ah Covid kaihhnawhin a thi a, July 30-ah hri a kai tih hriatchhuah niin hemi ni hian ZMC-a dahluh nghal a ni. Hemi chhun, dar 12.30 khan C Lalkima (96), Venghlui chu Covid kaihhnawihin ZMC-ah a a thi a, a ni hi taksa lama chak lohna nei sa niin, July 21 khan hri a kai tih hriatchhuah a ni a, July 24-ah ZMC-a dahluh a ni.

August 1 zing dar 5.00 khan Lalthianghlima (60), Chanmari Lawngtlai chu Covid kaihhnawihin Lawngtlaiah a thi a, ani hi July 22-a hri a kai tih hriatchhuah niin, Lawngtlai DHDC-a enkawl a nih laiin a thi a ni. Hemi ni zing dar 7.30 khan Vanlalawmpuii (17), Electric Veng Aizawl chu ZMC-ah a thi, July 22 khan hri a kai tih hriatchhuah niin, hemi ni hian ZMC-ah dahluh a ni. Vanlalawmpuii hi nikum atangin a taksaa hrisel lohna nei tan a ni a, inentirin damdawi in pawh an pan fo. Kumin July 22 khan a kaih a, Civil Hospital Aizawl panpui niin, hetah hian a sample endiknaah Covid a kai tih hmuhchhuah a ni a, natna nei sa a nih avang hian ZMC-a enkawl tura lak niin, hetah hian a thling an lak atangin TB tih hmuhchhuah a ni a, TB hian a thluak a lo luh tawh bakah rin aiin a lo khawih chhiat hman tawh avangin ICU Extension-ah dahluh zui a ni a, theihtawpa a nunna chhan tuma thawktuten an beih laiin, Pathianni khan a chawl ta a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy