- Dr R Lalthangliana
Covid lai ai pawhin GST lut tlem
- Dr R Lalthangliana
MNF sawrkar laiin Goods & Service Tax-a lakluh a pung nasa a, tun sawrkar huna GST lakluh tlakhniam dan em em chu Covid len lai pawha thleng lo a ni tih MNF hruaitu Dr R Lalthangliana chuan a sawi.
Thawhtannia Mizo Hnam Run inkhawmah MNF senior vice president Dr R Lalthangliana chuan tunhnaia Union Finance minister sawi danin, GST hniam reng reng chu Finance Commission atangin sum an dawng tha thei ngai lo tih a sawi a. MNF sawrkar lai khan GST lakluh a pung nasa a, tuna GST tlahniam ta em em chu restricted tender leh departmental-a contract hna inpek a nasat vang a ni thei tih a sawi.
Kum 2017- 2018 a GST dan hmanga chhiah lak a nih tanga a vawikhatna atan kum 2024- 2025 ah Mizoram GST lakkhawm a tlahniam duai a, Covid hunlai pawha la thleng ngai lo a ni tih MNF sawrkar laia minister hian a sawi.
“A chhan ni ta ber chu, budget figure atanga enin ZPM sawrkar hi finance enkawlah a hlawhchham chiang hle. 2024- 2025 chhung kha inrenchem kumah puang mah se, Mizoramin leiba cheng vaibelchhe 3133.45 a neih belh niin CAG report-ah tarlan a ni. Covid kan tawrh nasat ber kum pawh khan vbch.1800 chauh kan puk a, kumin hi sawrkarin sum a puk tam ber kum a ni. A sumfaiin a tam a, GSDP percent atanga chhutin Mizoram leiba san ber kum a ni,” a ti.
Sawrkar tha leh rintlak chu hun harsa a lo thlen changa huaisen taka mawhphurhna la ngam, midangte puhmawh leh dem mai mai ching mi a ni tur a ni lo tih a sawi bawk.
Mizorama inkalpawhna kawngpui hrang hrang bakah sawrkar building tha leh ropui zawng zawng MNF kutchhuak deuh vek niin, development liantham zawng zawng an kutchhuak deuh vek a ni tih MNF senior vice president hian a sawi.