Daily Newspaper

COVID MAWHPUH VEK NGAWT SUH

11

Mahmuaka Chhakchhhuak

March thla atangin CoviD hripuiin min hnaih tan a, kan khawsak phung a rawn tibuai tan ti ila a dik awm e. Mipui nawlpui atanga sorkar hruaitu ber ber thlenga kan lo inpuahchah lawk loh avangin kan theih ang ang leh thiam dan danin kan inbuatsaih tanin kan inveng tan a, a then laiah thupek piah lama khauh taka kaihhruaina kenkawh a nih laiin a then laiah an lo thlahdul deuh bawk a, hmun thenkhatah duty te thawhpui that a nih em em laiin hmun thenkhatah duty zawkte chuan thilsual an tih avangin man an tawk bawk a. April thla phei kha chuan sorkar order chhuak tawh kha whatsapp group pakhat vanga tihdanglam a nih hial kha maw le. He CoviD hi a ngeiawm takzet a, mipui vantlang tan leh sorkar lam tan pawh zirchawp vek a ngai tlat a, nunna a suat theih tlat avangin ngaihven loh theih a ni bawk si lo. Chutiang boruak chu hrang hrangin min chenchilh reng chung chuan July kan lo chuangkai leh der ta mai le.

Kan hripui leng chuan nunphung a tibuai ngei mai a, engtia rei nge a len dawn a, engtik thleng nge min tihbuai dawn tih lah chu a hriat bawk si loh avangin kumin hi a awh tluan maithei a, kum 2 lai emaw a aia rei pawh a awh maithei bawk a ni. Engpawh nisela, Zoramin March thla atang khan kan buaipui tan tawh a, tunah July kan chuangkai tawhin kum chanve dawn lai chu alo ni ta reng mai. He CoviD vanga kan khawsak buai dan leh kan khaihlak dan chu sawi ngai loin mitinin kan hre vek awm e. Mi rethei ber atanga mi hausa ber thlenga kan buai chhan a nih avang leh khawpui leh thingtlang kan buai vek avang hian he hripui vang hian tumah kan inthliar thei hauh lo ang. Kan theih dan danin ei leh bar zawnna kawngah kan ngaihtuahna hman a ngai a, sum nei deuhte tan pawh lei tur a awm ngawt bik chuang si lo. Nitin inhlawh chawp tan phei chuan he hri leng hi a ngeiawm lehzual a, a thinrimthlak takzet a ni. Zirna lam leh Sakhuana lam thlenga a nghawng vek avangin a pawi a, ngaihtuah chian ngial pawhin a pawi a nih hi. Nimahsela kan tih theih engmah a awm chuang si lo a, kan theih chhun chu hri leng chunga kan khawsak buai lohna tura kan theih dan dan anga hmalakna a ni mai.

March/ April velah kha chuan kan chiai ta-lang khan ngaihtuahna fim pawh kan hmang hleithei lo maithei a, kan khawsak alo buai deuh a nih pawhin a awm viau tho e. Nimahsela vawiin thlenga khawsak kan la buai reng fo a nih chuan keimahni dik lohna zawk a ni thei ang. Nitina inhlawh thin mi kan ni emaw, mahni kutkawih hmanga eizawng mi kan ni emaw sorkar/ company hnuaia hnathawk mi kan ni emaw pawh nisela hei ni 100 chuang CoviD in min chimbuai tawh avanga CoviD chim rengna hnuaia khawsak chu thiam tawh tur kan ni. Kan eizawnna ber chu a khaihlak phah ngei ang. Kan sum leh pai lak luhna ber pawh a ping maithei e, nimahsela chutia kawng a pin avang chuan kan thu thluang mai thiang ngawt lo. Pathianin hriselna tha min pe a, kut leh ke, fuke kimin min pe a, ngaihtuahna hmang thei turin thluak tha tak min pe bawk. Heng Pathianin thilsiam dangte aia mihring ropui taka min din chhan hi kan hmang tangkai tur a ni dawn lawm nit

Zinga hma taka tho thin kha CoviD vangin i thawh tlai phah ang a maw? I fate nitin school kal thin kha CoviD vangin an kal thei tawh si lo a, Inah games an khel mai mai zawk ang maw? A teuh lo mai. CoviD vangin pawn chhuah a rem loin pawn lama hnathawh a theih loh pawh a ni maithei e, i zing thawh tih danglam phah kher suh. Hma takah tho la, pawn chhuak kher loin inah tih tur zawng mai rawh. Chutia tih tur i hre mai lo a nih pawhin lehkhabu chhiar rawh. Lehkhabu tih vangin thawnthu bu leh engemaw kher pawh a ngai lo. Bible i kawl lai kha chhiar mai rawh. Bible chhiar hian thlarau nun a chawm mai piah lamah mihringah finna nasa tak a pe thin bawk a nia. Nitin bung khat tal chhiar ziah han tum phei la chuan a hlawkna i chhar hrim hrim ang tih ka tiam ngam a che. Social media lama kut hlei viau te hian mi tam berah hi chuan hlawkna a pek aiin an hun hlu tak a paih sak zawk a nia. Whatsapp group-a tutute emaw nena fiamthu thawha nuih uar uar te hian duh aia rei hun hman a awl fo thin.

Chhungkua ang pawhin sawi ila, he CoviD hian min tihbuaina chu a awm ngei ang. Nimahsela nitina intihbuaitir erawh a rem kher lo ang a, CoviD hripui nena hun hman thiam kan tum mai tur a ni. Fate zawng zawng nena nitin zantin mai ina awm thup thup alo ngai ta a nih pawhin nitin vawikhat tal chhung inkhawm han nei thung ila. Chhung inkhawm nei ngai lo tan chuan a har maithei a, nimahsela kristian chhungkua nih ve bawk chuan kan tihmakmawhah ngai zawkin tihluihna nen pawha kan tih hram hram a tha. Chuti taka hlawkna awm loin a hlawkna kan hre mai lo a nih pawhin discipline hnuaia chhungkua kan awm hrim hrim pawh hlawkna pakhat a ni tho tho. Shillong kan awm laia kan zirtirtu pakhat chuan class-ah an chhungkaw chanchin a sawi zauh zauh thin a, a sawi pakhat tha tih deuh ka neih chu ‘kan fate nen hian an ngaihzawng te chanchin hi kan sawi ho thin’ a tih kha a ni. Chutiang em em chuan keini chuan kan thei lo a nih pawhin nu leh pa tan chuan fate kawmngeih theih hi a hluin a tha ngawt mai. Pl. Liandinga’n kum 1983 vel lai daih tawha a ziak mah nisela tun hun pawha tangkai tak tur la ni reng hi he CoviD chimbuai reng karah pawh hian vawng reng ila kan hlawkpui ngei hian ka ring a ni – ‘Kan kuta hmanraw awmsa reng hman thiam hi a pawimawh khawp mai. Chumi kalhlen a hmanraw dang va dap va dap hi thluak sawizawi hma chuan thil awmze nei lo tak a ni duh khawp mai. Kan kuta hmanraw awmsa reng, englai pawha kan ban phak hun hi pawimawh deuh a ni’.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy