Daily Newspaper

Covid vanga nu leh pa chan naupangte ngaihtuah bikna tur duang

14

Supreme Court thuchhuak ang leh sawrkar laipuiin ruahmanna a siam angin, Covid-19 kaihhnawiha nu leh pa chan, naupangte chhawmdawlna leh hamthatna tur hrang hrang ruahman a ni.

Hemi chungchanga Aizawl district chhunga hetiang vanduaina tawk naupangte chhawmdawl leh enkawl zui an nih theih dan tur ngaihtuah hian Ningani khan District Child Protection Committee, Aizawl District chu an chairman, district bawrhsap Dr Lalhriatzuali Ralte hoin an thutkhawm a. Children Home-a naupangte hamthatna tur hrang hrang pawh ngaihtuah tel a ni.

DCPC Aizawl District hotute sawi danin, Supreme Court chuan India rama state leh union territory hrang hrangte chu, India rama Covid-19 hri a len nasat hnu, March 2020 hnulama Covid vanga an nu emaw pa emaw chan leh, chhan dang vanga nu leh pa chante chhinchhiah a, an chanchin kimchangte National Commission for Protection of Child Rights-a thlen vek turin a ti a. Heng naupangte hi an khawsakna kawngah harsatna engmah an tawh zui loh nan a, ei leh in tur, zirna, hriselna lama an mamawh leh mamawh dangte chu sawrkarin a tul anga ngaihtuah vek turin a ti a. Hetiang vanduaina tawk naupangte hmatheha hmanga sum hmuhna kawnga hman emaw sawrkarin dan a siam ang zawm loa lo lak (adopt) emaw pawh phal a ni lo tih a sawi bawk.

July 15 khan Covid vanga nu emaw pa emaw chan, kum 18 hnuailamte chhawmdawlna tur sawrkar laipuiin a ruahman – PM Cares for Children – Empowerment of Covid Affected Children chu Prime minister Narendra Modi chuan a khuhhawng bawk a. Vanduaina tawk naupangte hi chhinchhiah vek tura tih niin, kum 18 an tling ve leh PM Cares Fund atang hian thla tin stipend an dawn theih dawn bakah kum 23 an tlinin cheng nuai 10 an dawng thei dawn a. A thlawna zirna pek tur an nih bakah higher education atan students loan an la thei ang a, PM cares Fund atang hian loan interest hi rulh sak an ni dawn, tih te a ni. Heng bakah hian Ayushman Bharat hnuaiah kum 18 an tlin thlengin health insurance cheng nuai 5 tihsak an ni dawn a, PM Cares atang tho hian premium peksak an ni dawn a ni.

He thutkhawmah hian Aizawl district chhunga Covid-19 vanga an nu/pa chan zawng zawngte heng ruahmanna an chan theihna tura buaipui dan rel a ni a. Report danin, Aizawl district bikah hian Covid kaihhnawiha nu/pa chan naupang 46 an awm tawh a ni.

Thu ngaihtuah dang zingah, Covid kaihhnawiha Childrens Home-a hma lak dan tur rel a ni a. Report danin, Childrens Home bikah Covid thawhkhatnaah khan Home naupang 8-in hri an kai a, hrileng thawh hnihnaah hian Home naupang 40-in hri an kai tawh bawk. Home enkawltu lamten harsatna leh mamawh hrang hrang, Aizawl district bik leh Mizoram puma an neihte an sawi lang a. Covid leng laka Home naupangte leh thawktute an him zel theih dan tur te, ration buhfai leh health care scheme-a ziahluh an nih ve theih dan tur pawh sawiho a ni a, a tul anga hma lak zel tum a ni.

Mizoram Home Association aiawhte chuan nikum July hnu lamah sawrkar laipui atanga fund an dawn tur angte an dawng mumal ta lo hle tih an sawi a, sum lam leh buhfai bikah harsatna, a bikin Covid-19 len hnu ah an tawk nasa tih thutkhawmah hian an sawi a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy