Daily Newspaper

Covid vanga thi tam ber Aizawl district

16

Covid-19 kai hmuhchhuah 27,488 atangin he hri kaihhnawiha nunna chan 123 an awm tawh a; Aizawl district-ah thihpui an tam ber a, 99 an thi tawh.

July 19 tlai dar 5.00 thlenga Health department chhinchhiah danin, Mizoramah Covid kai leh kai loh endik tura sample 5,57,238 lak atangin hri kai hmuhchhuah 27,488 an awm a; heng zinga 123 chu he hri kaihhnawih hian nunna an chan tawh a ni. Hri kai hmuhchhuah atanga chhutin za zelah 0.45 a ni. Hri kai zinga 21,582 chu damin an chhuak tawh a, hri kai hmuhchhuah tawh atanga chhutin zaa 78.51 a ni. Enkawl mek 5,784 an awm.

Hemi hun chhung thleng hian Covid kaihhnawiha nunna chan pakhat (123-na) a awm belh a. July 19 zing dar 9 khan Salath Nath (62), Silchar chu Covid kaihhnawih vangin Lawngtlai District Hospital-ah a thi. Covid symptoms a neih avangin endik tir a ni a, hri a kai tih hi nimin khan hriatchhuah a ni. YLA Lawngtlai Bazar Branch-in an tuamhlawm a ni.

Tun thlengin Covid kaihhnawiha nunna chan hi Aizawl district-ah an tam ber a, 99 an awm tawh. Covid kai hmuhchhuah tawh leh enkawl mek pawh an tam na ber chu Aizawl district tho hi niin, hri kai 18471 an awm tawh a, dama chhuak 14,691 awmin enkawl mek 3,681 an awm.

Aizawl district tih lohah Covid kaihhnawiha natna thihpui tam ber chu Kolasib district a ni a, mi 9-in nunna an chan tawh. Siaha, Hnahthial leh Khawzawl district-ten Covid kaihhnawiha nunna chan an la nei lo a ni. Aizawl district tih lohah Covid kai enkawl mek tamna chu – Lunglei (577), Kolasib (543) leh Lawngtlai (541) an ni a. Hnahthial (3), Khawzawl (6) leh Saitual (10) chu enkawl mek tlemna district a ni.

Hetihlai hian July 18-a sample 1339 endik atangin Covid kai hmuhchhuah thar 335 an awm a, sample endik atanga chhutin hri kai hmuh thar hi za zelah 25.02 a ni phak a ni.

July 18 (Pathianni) hian dan pangngaiin RT-PCR laboratory tihfaina ni atana hman thin a nih avangin sample endik a awm lo a. Hri kai hmuhchhuah te hi TrueNAT atangin 5 leh Rapid Antigen Test atangin 330 an ni. An zinga 288 hi an taksaa natna langchhuak tawh an ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy