Daily Newspaper

Covid vangin Myanmar harsatna a zual zel

9

February ni 1 khan Myanmar sipaite chuan civilian sorkar paihthla in thuneihna an inbel a. Chumi duh lo chuan ram chhung hmun hrang hrangah lungawi lohna lantir niin mi tam takin nunna an chan phah bawk.

Lungawi lohna lantir zingah healthcare workers sang tam takte telin chu chuan healthcare system tlachhiaa siamin Myanmar-in Covid-19 vaccine pekchhuah a kalpuite chuan harsatna nasa tak a tawh zui phah a ni.

Tunah inkaichhawn awlsam zawk Delta variant-in a nuai mek a, Myanmar-in harsatna a tawh chu a nasa hle a ni.

Oxygen factory pawnah mi tam tak intlarin an cylinder te tihkhat an tum a, sorkarin oxygen hralh a khap chungin zawm a hlawh chuang lo. Thlanmualah pawh ruang phum sen a ni lo hial bawk.

‘Covid vangin kan thi dawn nge politics buai nghawng vanga harsatna vangin kan thi zawk dawn kan inzawt reng a ni’ tiin journalist Aye Mya chuan a sawi a. ‘Thih kan duh dan zawk thlang tur ang mai kan ni’ tiin a sawi.

Myanmar-ah hian Covid-19 kai 280,000 an awm tawh a, nunna chan 8,2000 an awm tawh bawk a. Mahse, hei hi official data niin hei ai daih hian an tam zawk tura ngaih a ni a, chumai bakah test kalpui that a ni lo bawk. July thla chhungin mi maktaduai 54 vel chenna Myanmar ah mi 9,000 atanga 17,000 vel chauh test an ni.

Nunna chan te pawh chiar mumal an ni lo, medical facility a thi te chauh official a chhiar an ni bawk.

Aye Mya chuan nunna chan zingah a nu ngei pawh a tel thu sawiin test a ni hauh lo va, mahse, Covid symptom a nei vek tiin a sawi.

Aye Mya hi journalist a ni a, a hming tak ni lovin a him zawk nan a hming lem hman a ni. Sipai ten lung in-ah an khung a, thla li vel lai an khung a ni.

‘Lung in-ah khan room khatah mi 50 vel min dahkhawm a, kan zingah khan Covid-19 ni ngei tur damlo na tak tak an awm’ tiin a sawi.

“Ka nu kha lung in atanga ka chhuah lai khan a hriselna a tha. Keimah zawk ka dam loh hnu lawkah a damlo zui ve ta a, kei chu ka tha chhuak mai a, ani erawh a tlahniam tial tial a. Engmah a ei thei lo va, thawk lama harsatna a nei zui a” tiin a sawi.

“Biological weapon hmanga beih kan ni emaw ni aw tiin ka ngaihtuahnaah a awm hial a ni” tiin a nu thih dan chungchang a sawi a.

“Damdawi in kan tanpui a, oxygen mamawh kan nei thei si lo. Oxygen nei awm angte kan biak rawn pawhin tumahin an nei si lo, oxygen zawnga kan buai laiin ka nu chuan min peih lohsan ta a ni” tiin a sawi.

Oxygen chu Myanmar-a bungraw hlu ber a ni mek a. Chutihlaiin Military leader Min Aung Hlaing chuan Myanmar-in Oxygen a tlachham lo tiin a sawi tlat thung.

Sipaite chuan oxygen cylinder te man khawmin military hospital-ah an dah zel nia sawi a ni bawk.

Myanmar medical system chu derthawng sa a ni chungin nikum kha chuan virus leng lakah pawh tha takin an inhumhim thei mai a. Mahse, sipai sorkar a pian chiah hnuah a buai zo ta a ni.

“Pandemic leng lakah kan inpeih lo nasa a, hripui leng chu remchangah sipai ten hmangin sorkar an paihthla zui bawk a. Mipui engah mah an ngaih lohna hi a rapthlak zawk a ni” tiin Khin Zaw Win, director Tampadipa Institute, Yangon chuan a sawi.

“Ram dangte chuan hripui lengin chhiatna nasa zawk a thlen loh nan medical system tlachhe tur dan an tum a ni a. Myanmar-ah erawh civilian sorkar paihthlakin health system a tichhe vek zawk a ni” tiin Dr. Phyu Thin Zaw, University of Hong Kong a health expert chuan a sawi.

Civilian sorkar paihthlak duh lohna lantir hmasa berte zingah medical worker-te telin an zinga mi 72 velte chu tun thlengin hren an la ni bawk a, hren zingah hian vaccination programme hotu lu pawh a tel a, mi 600 chuang man an ni bawk.

Sipaite chu vaccine pekchhuah tikhawmuangtua puh an ni bawk a. Sipai tena civilian sorkar an paihthlak hma ningaah vaccine pekchhuah tan a ni a, hei hi nasa taka tihbahlahin a awm zui a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy