Daily Newspaper

Croatia tlawm tur chhantu veteran Modric freekick

12

Kum 36 leh ni 32 chiaha upa ni chungin Thawh-tanni zanah Luka Modric chuan free-kick atangin Croatia siphurh sutna goal a chhuihlut a, an mikhual Slovakia lakah 2-2 draw hlawhchhuakin, World Cup 2022 qualifiers kal meka free-kick goal thun thei upa ber a ni.

Group H hmahruaitu ni chunga mikhual thleng Croatia lamin si an phur hmasa a, he goal hi first half minute 20-na lekah winger Ivan Schranz tihluh niin, minute nga liam hnuah Marek Hamsik-a cross atangin Andrej Kramaric chuan mikhual hmahruai nawnna goal a khung leh ngat a, he goal hmang hian Slovakia chuan half time-ah 2-1-in hma an hruai.

Second half laihawl minute 71-ah Luka Modric chuan free-kick atangin home team siphurh sutna goal a chhuihlut a; minute 83-ah substitute Nikola Vlasic chuan hnai set sawt atangin Croatia chakna goal ni thei tura ngaih chhuihlut bawk mah se kha goal luh dawna an insingsak vel laiin Ivan Perisic a lo offside a, West Ham United attacking midfielder Vlasic-a goal chu hnawl a ni a, an kawtkaiah Croat-ho an chak zo lo.

Thawhtanni inkhel dangah Russia chuan 2-1-a mualneitu Slovenia hnehin Group H hmahruaitu Croatia an luahlan a, khelh riata point 19 neiin Russia dinhmun a tha ta zawk a, Croatia tana automatic-a 2022 World Cup khelh phak beiseina a derthawng zo ta rih.

Group H hi team pahnih inelna niin, khelh riata point 19 neitu Russia hian point hnihin pa-hnihnaa chhuk Croatia an kalsan a, pathumna leh palina luahtu Slovakia leh Slovania chuan point 10 ve ve chauh an la hum avang-in hmahruaitu pahnih tan hlauh tham tling lo tura ngaih an ni.

Russia leh 2018 World Cup runners-up Croatia-te hian an group atanga automatic-a tlinna lo bawhpelh pawh ni se play-off kaltlangin hun remchang dang an la nei thei dawn a, pathumna Slovakia leh palina Slovenia tan khelh hnih la awmah top two thlen chhoh ngaihna a awm tawh lo.

November ni 11 khian Russia chuan Cyprus mikhualin, Croatia-in Malta an tlawh thung dawn a; nithum hnuah a sang pahnih hi an inhmachhawn dawn a, he game hi Group H atanga nakum Qatar ram tournament khel tur tichiangtu ni tura ngaih a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy