Chief secretary Khilli Ram Meena chuan August 7-11 chhung khan Mumbai a tlawh a. Mumbai Mizoram House-a thawktute nen an inkawmnaah damlo enkawlna leh Mizoram House siam chungchang an sawiho.
Mumbai Mizoram House deputy resident commissioner H Lalruatliana’n a lo dawngsawng a. Mizoram House-a thleng damlote chu chief secretary hian an thlenna room-ah theuh a kankual a. House-a thawk te leh damlote chuan Mizoram chief secretary-in Mumbai Mizoram House an tlawh vawikhatna nia an hriat thu leh an thlamuan thu an lo sawi a ni.
Chief secretary Khilli Ram Meena hian Maharashtra chief secretary Rajesh Kumar Meena chu a chenna inah kawmin, Navi Mumbai-a Mizoram House siam tum a sawpui a. Maharashtra chief secretary hian CIDCO managing director chu phone-a be nghalin thil awm dan a zawh chian hnuah Mizoram sawrkarin extension permission dilna a thehluh tawh chu a rang lama lo enzui turin a hrilh. Mizoram chief secretary pawhin TATA Memorial Hospital leh Mizo cancer vei Mumbai-a inenkawlte inkara thawhhona tha neih a pawimawh thu a sawi bawk.
Hemi chungchangah hian Maharashtra chief secretary chuan TATA Memorial Hospital thuneitute hnenah a tul anga ruahmanna siam turin ngenna a siam dawn tih a lo hrilh a ni.
CS-in Mumbai Mizoram House tlawh
