Champhaia Common Service Centre (CSC) kaltlanga online hmanga certificate pawimawh hrang hrang pek chhuah kawnga hmalakna leh bawhzui tulte sawiin district bawrhsap James Lalrinchhana kaihhruaiin Thawhtanni khan thutkhawm a ni a. Online hmanga Champhai district-a CSC supervisor-te nen thutkhawmah hian certificate buaipuina man lak, sawrkara revenue chhunluh, certificate pekchhuah buaipui kawnga hmasawn ngaihna laite leh tul dangte sawi a ni.
Bawrhsap chuan mipuiin awlsam zawka hna an thawh theihna tur leh awlsam zawka certificate pawimawh an hmuh zung zung theihna turin sawrkarin theihtawp a chhuah tih a sawi a. Hemi kawnga hna hmasa thawktu CSC supervisor-ten chanvo pawimawh tak an chelh thu sawiin, fimkhur tak leh dan anga thawk turin a chah. Harsatna an neihte sawrkarin a ngaipawimawh tih sawiin, mipui hmakhua ngaia DC office leh CSC-te inkara inremna – Service Level Agreement (SLA) zaha hemi anga kal zel tur a ni tih a sawi. Champhai district chu ramri depa awm a nih avangin CSC supervisor-te chu DC office peng pawimawh tak an ni tih inhria a, rinawm leh zahawm taka hna thawk tur leh, diklo nia an hriat chu rilru fim tak pu chunga hnar ngam turte, harsatna an neihte DC office-a thlen hrehlo turte in a chah bawk.
DC office leh CSC te inremna anga certificate hrang hrang – Scheduled Tribe, Residential leh Income Certificate buaipui na’na CSC-in processing fee a lak tura bituk, certificate pakhat zela Rs 30 tih chu sawrkar dan dinglai a nih angin zawm rih phawt a tul tih sawi a ni.
Certificate pakhat siamna atanga CSC-in Rs.30 a lak atanga sawrkara revenue an chhunluh tura bituk Rs.10 chu karhnih dan zela DC office e-district designated bank account-ah chhunluh zel tur tih a ni a. Revenue chhunluh tur la chhunglut kimlote chu tun thla chhunga chhunglut vek tura chah an ni.
Heng bakah hian certificates pawimawh tak takte pekchhuah kawnga duhkhawp lohna awm leh hmasawn ngaihna laite sawiho a ni a. Document lem dapchhuah kawnga thawhho theih dan tur pawh sawi a ni bawk.
CSC kaltlanga certificate pechhuaktute nen inrawnkhawm
![](https://theaizawlpost.org/wp-content/uploads/tap_logo-min-large.jpg)