CSR luanluhna atan Mizoram tinzawn mek
– Lalrinpuii
Mizoram-ah corporate social responsibility (CSR) a dawng tlem tih a sawi chu CSR lama India ram puma mi hriat hlawh Dr Bhaskar Chatterjee beng a verh a, helam hawiin hma a rawn la mek tih minister Lalrinpuii chuan a sawi.
Mizo Hmeichhe Insuihkhawm Pawl hruaitute nen hun an hman honaah minister hian, CSR pawimawh zia leh Mizoram pawna a hun hman thin ram tana a hlawk zia sawiin, tunhnaia award a dawn tumin Mizoram chu CSR dawng tlem ber a nih avanga company liante CSR rawn chhunglut tura a sawmna chuan “Father of CSR in India” tia an koh thin Dr Bhaskar Chatterjee beng verhin, CSR 1% chauh luhna Mizoram a tinzawn nghal dawn a, an indawr mek a, Aizawl lo tlawh a tum tih a sawi.
Bhubaneswar-a CSR & Sustainability Conclave 2025 an chhim tumin thil thar siam chhuaktute nen indawrin, Mizorama mitdel zawng zawngin mitdel tiang tha chi an dawn theihnan Toyota company atangin CSR cheng vaibelchhe hnih dil mek a ni tih a sawi a. Zoram Medical College & Hospital (ZMC&H) a lung zaina tur operation theatre (OT) saknan leh bungraw leina atan State Bank of India Mutual Fund-in cheng vbch. 4.4 a pe a, sak mek a ni a; Indian Oil Corporation Ltd. atangin ZMC&H-a Neurosurgery OT saknan cheng vbch 2.2 dawn a ni tih a sawi bawk.
MHIP Gen. Hqrs chuan ‘Women Icon Award 2026’ dawngtu minister Lalrinpuii hi Nilaini khan lawmpuina an hlan a. Kumin February 11-a New Delhi-a Achievers’ World, Indian Achievers’ Forum leh All India Business & Community Foundation (AIBCF) tangho buatsaih ‘National Summit 2026 – Vikshit Bharat 2047 through Comprehensive Socio-Economic Development’ ah Health & Family Welfare leh Social Welfare, Women & Child Development minister chu he award hi hlan a ni.
Lawmpuina dawngtu Lalrinpuii hian award a dawn dan a sawi a. A chanchin hriaten Women Icon Award dawng turin a hming an lo rawt sak a, he award buatsaihtute hian Bangalore-a hmeichhia leh mi harsate a lo tanpui thin dan leh Mizorama hmeichhia cabinet minister hmasa ber a nih thute lo hriain, a department chanah Viksit Bharat 2047 nena inrem takin Mizoram Universal Health Care Scheme hmanga mipui hnena man pe lawk lo (cashless) a health insurance an pek bakah ‘ruang phurh’ policy hmanga miretheite in luma an chhungte ruang an phurh thlensak chu ropui an ti a, India ram tana Mizorama a hnathawh chu chawimawi tlakah ngaiin an rawn thlang tih a sawi a ni.
CSR luanluhna atan Mizoram tinzawn mek – Lalrinpuii
