CSS hnuaia thawkte state sawrkarin a dah ngheh theih loh chhan chu danin a rem tih loh vang niin, adviser to chief minister (Finance) TBC Lalvenchhunga chuan a sawi.
Thawhtannia ZPM party office-a inkhawmah MLA TBC Lalvenchhunga hian CSS hnathawkte an dahngheh theih loh chhan hi a sawi a. “Dan hi kan zah tur a ni a, dik taka ro kan rel theihnan kan huai ngam tur a ni,” za ti.
FCAA 2023 chungchang a ni emaw thil dang dangah pawh, an hruaitute thusawi awih zir turin a chah a. An dik tawk lohnaah pawh sawisel ngam turin a chah. “He ram tana kan chan tawhna chu kan chan tawh nise, he ram tan a dang pawh chan ngam ang u,” a ti.
Mi dik lote hrem ngam tur chuan anmahni an dik phawt a ngai a; mipui chan ai an la loa, an eiru lo tih an sawi ngam avang hian tunah rih chuan an huai ngam tih adviser to CM hian a sawi. Mipuiin an hlawkpui dawn chuan an chan ngam mai tur a ni tih a sawi.
“Transfer chungchangah pawh mipui inrawlh lo ngam ila, insawipui hi kalphung hlui zia a ni. Mahni duh dana sawrkar hnathawh tum pawh kan do ngam tur a ni,” a ti.
Sawrkar turin kum tam tak an lo vakvai ve tawh, tia hlawkna an um a nih chuan, he ram hmasawnna tur leh an vahvaih chhan kha an kalsan dawn tihna a ni tih a sawi a. Sawrkar ve tak avanga contract hna an beisei ngawt tur a ni lo tih a sawi a ni.
“Sawrkar kal tawhte atangin contract hna zawh loh 200 chuang leh K. Deposit-ah cheng vaibelchhe 1500 chuang kan chhawm. Sawrkarin sum a neih loh zia kan hria a, hall sak leh field phaha contract hnathawh hi he ram damna tur leh hmasawnna tur a ni lem lo. MLA leh minister-te zim luai luai hi hman ata tawh Mizo mipui chin than a ni a, hengte hi kan bansan a hun tawh,” TBC Lalvenchhunga hian a ti a. Opposition an nih laia ram an hmangaih ang khan tunah pawh an la hmangaih zel tur a ni tih a sawi.
CSS hnathawk dahngheh theih loh chhan chu danin a remtih loh vang – Adviser to CM
