Cuba pan puihna phur lawng pahnih chin hriat loh hmu leh

Mexico atanga Cuba pan tur, puihna thil phur lawng pahnih chu Caribbean-a biakpawh theih lohva an bo hnu ni eng emaw zat hnuah hmuh a ni.
Mexican Navy chuan an thlawhna pakhatin Cuba khawpui, Havana atanga tuipui mek 80 (km 148) vela hlaah lawngte hi a hmu tih an sawi.
Nuestra (Our) America Convoy thupuangtu chuan a hmain lawnga thawkte hi an him tih a lo sawi tawh a. Amah leh Mexican Navy chuan Friendship leh Tigger Moth bo chhan hi engmah an la sawi lo thung.
Lawngte hi January thlaa US-in tuialhthei pek luh a dan hnua tlakchham nasa tak a awm hnua thliarkar ram tana bungraw phurh tum lawng eng emaw zat zinga mi an ni.
Mexico hmar lam kil, Quintana Roo state-a Isla Mujeres atangin March 20 khan an chhuak a, Thawhtanni emaw, Thawhlehni emaw vela an tumna thleng tura beisei an ni.
Lawngah hian thawktu pakua – Poland, France, Cuba leh US mite an chuang.
Nuestra America Convoy thupuangtu chuan, “Lawngte hian Cuba khawpui, Havana panin an zinkawng an chhunzawm zel,” a ti a. “Convoy hian an tum puitlin turin an kawng an zawh zel a, Cuban-te hnanah puihna hmanhmawhthlak pek an tum,” a ti.
X-ah Mexican Navy chuan lawngte nen radio-a an inbiak thu an sawi a, ‘tanpuina turin’ lawng an tir tih an sawi.
US President Donald Trump-a’n communist-in a enkawl rama tuialhthei thawn a khap atang khan Cuba-a chengte puihna pe tura hmalaknaah hian mahnia inpe leh sorkar ni lo pawlte an che nasa hle.
UN chuan Cuba chu supply tlakchhamna nasa tak a tawk mek niin a sawi a, tuialhthei an tlakchhak avang leh an hmanruate hlui tawh avangin ram puma thim vawi tam tak awm tawhin inzai ngai 50,000 chuang thulh tawh a ni.
Ei leh in leh damdawi tlakchhamna avang hian thil thleng zen zen lo, khawlaia lungawi lohna lantira mipui punkhawm pawh a awm zauh zauh tawh.
Kar hmasa khan Cuban sorkar chuan puihna ton 14 phur lawng a thlen hnuah a lawm hun a sial hial.
Lawng hi Communist hruaitu thi tawh, Fidel Castro-a’n kum 1950 chhoa a revolution kalpui tura Cuba rama a kir lehna lawng hming chawia ‘Granma 2.0’ tih a ni a, solar panel, damdawi, nau chaw, bicycle leh ei tur a phur a ni.
January thlaa US-in Venezuela president hlui, Nicolás Maduro a man a, Cuban thawhpui tha tak ram atanga tuialhthei thawn a tihtawp hnuah Trump-a hian Caribbean thliarkar lam hi a hawi leh ta a ni.