Cue sports dawhkan kiltu Lalrina Renthlei leh a tiang!
Mizoram Snooker & Billiards Association (MSBA) lamin an nau talent nei tha chungchuang, cue sports khawvela thui tak inhawlh thleng thei tura an beisei, Tuikhuahtlang val Lalrina Renthleiin awmze nei leh hlawk zawka training tha a neih theihna turin England footballer huaisen leh tharum ngah, Alan Smith-te’n an vanglai an hmanna Leeds khaw bula Sheffield-ah kum 2013 khan World Snooker Academy bel turin an thlah a, he hmunah hian Rina hi thla hnih dawn a intuaihriam hnuah Mizoram panin a rawn let a, a hmaa dawhkan inhunga ball chu a hawlh thelh ta lo viau!
‘In Rin – We Trust’ tih poster hlawhchhuak thei khawpa basketball huanga rin hlawh Rina Renthlei hi tualchhunga cue sports chanchinthar lam apiangah pawh a champion thu a lang nawn awn awn a – Mizoram ranking lama number 1 ni rei ber record-te a kawl.
Infiammi tam tak ang lo takin, Mizoram piah a thlir a, chumi tur chuan thawhrimna nen a bei bawk…
Cue sports (Snooker, English Billards, 9 Ball, 8 Ball, 10 Ball etc.) khawvelah hriat a hlawhchhuak tawh a, India mipui maktaduai zingah U-21 snooker chu thununin, a champion nghal der.
Hemi hnu hian China rama nghah Under – 21 World Championship-ah khan top 8 inhawlh thlengin hmelhriat a hlawh nasa lehzual a, vanduaithlaktakin, kawng tha lo (spine injury) avangin a bawksawp zui a, top 8 player-ho zinga professional player ni zui lo awmchhun a ni ta hlauh!
Infiamna huanga hlawhtling tam tak ang zia neitu Rina Renthlei rilru paukhauhzia a rawn lang a – natna khum atangin dawhkan bawhin Cue Sports huanga a rawn kir leh meuh chuan India aiawhin Qatar khawpui Doha lama 9 Ball World Championship-ah a rawn inphochhuak leh ta zawt mai!
Kum 2015 a rawn inherchhuah meuh chuan World Team Pool Championship-ah quarter-final a inhawlh thleng phak hial nia!
Olympic inelna huanga telh loh game ni mah se Tuikhuahtlang tlangval thlen chin World Championship tum hnih leh Asian Championship vawihnih lai khel pha hi Zofate zingah hian engtikah tak awm leh ang maw?
Cue sports piaha Lalrina Mizo basketball player piang tawh zinga tha ber (GOAT) a ni thei cheute hi fapa piang danglam bik a ni – India ram khawpui lian leh Asia chhim chhak lamah a invawrh sang zel a, basketball lamah insawrbing thin deuh mah se cue sports a hlat tak tak thei lo! August ni 26 – September ni 1 chhunga 2024 Joy Heyball International Open neih zawh takah khan world number one-te nen inelna hi hmachhawn hovin, round of 32 (Heyball hi a dawhkan India ramah hmuh tur a la awm lo!) inhawlh thlengin, inbuatsaihna beitham tak karah India atangin Thailand hi a pan a, phurna nasa tak nen a rawn let.
Heyball hi World Games 2025 leh Asian Indoor Games lo awm turah telh a ni dawn a, Olympic games zinga telh a nih theihna kawng zau tak hawnin a awm mek – heti a nih chuan, Mizo pa hmel hi a lanna tlang a sang thut thei tlat!
Hetiang boruak hip nuam zam vel kara hian mumal taka duhthusam inbuatsaihna nena tan lak Rina Renthlei hian a tum hle.
Tualchhung lamah 2024 MBBA league khelh mek ni mah se Zarkawt BCA Club puipa lamin Rina hi zau zawka a inphochhuahna dal lovin, basketball pawh ni lo 9 Ball a khelh theihna tur remchang an siamsak a; September ni 25-29 thleng awh tur Haw-Chi-Minh Open (9 Ball) khel turin Vietnam hi a pan leh dawn.
Cue sports khawvelah Lalrina hian Zofate dai ngai loh rama hnuhma tha hnutchhiah ngei turin khawvel huapa a tha ber berte nen dawhkan an bawh ho leh dawn tihna ni.
A tawnhriat leh talent zozaite hi Mizoram sports thanlenna kawngah leh kan hnamin chim chin sang lehzual rahbi a rah theihna turin he mi bik hi chhinchhiah ni teh se – a phu ang ngeiin…
Cue sports dawhkan kiltu Lalrina Renthlei leh a tiang!
