Mizoram Cycling Association (MiCA) chuan Remna Ni (June 30, 2023) hian Muthi ramah a duh apiang tel theih turin Cycling Race a buatsaih dawn a. He race-ah hian kawng bumboh leh chhuk chho tak tak tlan a ni dawn a, a race kalphung hi Cross-Country Olympic (XCO) a ni dawn a ni.
He intlansiakah hian category thum a awm dawn a, Junior – kum 17 chin a ni ang a, Master – kum 35 chung lam niin Elite-ah erawh chuan a duh apiang an tel thei thung ang a. Mi pakhat tan category pakhatah chauh tel theih a ni thun ang. Elite a pakhatnain Rs. 15,000; pahnihnain Rs. 10,000; pathumnain Rs. 5,000 an dawng ang a. Junior leh Master a pakhatnain Rs. 10,000; pahnihnain Rs. 6,000; pathumnain Rs. 4,000 an dawng ang a. Category tina pakhatna atanga pathumna hian Medal leh Certificate te an dawng theuh dawn a ni. Category tina palina leh panganaten Rs. 1000 leh Certificate an dawng ang a. He intihsiaka tel zawng zawngte tan hian ‘Participation Certificate’ buatsaih a ni bawk a ni.
‘Mizoram XCO 2023’ hi MiCA-in XCO race a buatsaih tum khatna tur a nih avangin rider te zingah pawh hetiang kawng hlauhawm leh chhuk chho a tlan nuam tichi te an phur tawh hle a. Mizoram chhung mai ni lo, ram pawn atang pawhin rider te lo tel tura sawm an ni bawk a ni. Thirsakawr eng chi pawh, electric hmang tih loh, he intihsiaknaah hian hman theih a ni dawn a ni.
Inelnaa tem tumte tan registration hi 15 June, 2023 (11:59PM) thlenga tite tan Rs. 300 chauh a ni ang a. A hnu lama ti duh te tan 27 June, 2023 (11:59PM) thleng tih theih a ni ang a, fee erawh Rs. 600 a ni thung ang. Registration leh fee te hi online hmanga pek theih a ni a, manual a form submit duh tan pawh Cycle Shop, Bawngkawn leh Js’ Hub, Mission Vengah te tih theih a ni ang.
Mizoram Cycling Association hi December 1, 2015-ah din a niin Mizoram Societies Registration Act hnuaiah kum 2021 khan a in-register a. MiCA hi Mizoram State Sports Council hnuai Member Association 33-na ni turin May 9, 2022 khan lakluh a ni. An hnuaiah Kolasib, Lunglei leh Champhai District Cycling Association te an awm mek a ni.
CYCLING RACE ‘MIZORAM XCO 2023’ NEIH A NI DAWN
