Central YMA chuan tunhnaia Manipur Jiribam district-a pawisawi lo nunna chan mi 11 an awm chungchangah a mawhphurtute chhuichhuak a, an phu anga hrem an nih theihnan sawrkar laipui hma la turin an phut tih an sawi.
Central YMA hnuaia Committee sang – YMA Central Coordination Committee (CCC) thutkhawm chuan November 7 zana mi tu tih hriatloh ten Manipur Jiribam district Zairawn khuaa in 17 an hal leh he khuaa Hermon Dew English Junior High School-a zirtirtu hna thawk lai Zosangkim Hmar w/o Ngurthansang Hmar nupui rawng taka silaia kah hlum a ni leh, November 11-a Central Reserve Police Force (CRPF) in Zofa unau pawisawi lo mi 10 rawng taka that a, hliam 1 a awm chu pawi an ti takzet a, thi chhungte an tuarpui tih a sawi.
CCC thukhawm hian resolution a siam a. ‘Kan unau pawisawi lo Pi Zosangkim Hmar leh CRPF-ten mi 10 that a, mi 1 an hliam hi kan dem takzet a. He thil thlenga mawhphurtute hi a rang thei ang bera chhuichhuah an nih theihnan leh an phu ang ngeia hrem an nih theihnan sawrkar laipuiin hma la nghal rawh se,’ a ti.
Nunna chan mi 11 leh hliam tuar mi 1 chhungte chu sawrkar laipuiin zangnadawmna pe ngei tura a beisei bakah Manipur tualchhung buaina chu a rang thei ang bera chingfel turin sawrkar laipui a phut tih a sawi bawk.
CCC thukhawm hian kumin October 24-a YMA Rorel inkhawm neiha thurel hrang hrang bawhzui dan tur a rel a. Thurel tam zawk hi CEC bawhzui turin a ti. YMA Inkhawmpui Lian neih loh kumah Sub-Hqrs. YMA Inkhawmpui neih ni rawh se, tia pass tawh chu, hemi mil tur hian tuna Sub.Hqrs hruaitute term kal lai hi pawhsei nise, an ti a ni.
CYMA-in nunna latute hrem turin centre a phut
