Sawrkar hnathawkten dear allowance tihpun an ngiatna chu tuna sawrkar sum dinhmun atang chuan tihhlawhtlin ngaihna a awm rih lo tih finance changtu chief minister chuan a sawi.
Thuthar thehdarhtute zawhna chhangin chief minister chuan tuna sum dinhmunah DA pung hi pe lui ta se, state sum dinhmunin a tuar hle dawn a. Tunah mai chuan pe thei dinhmunah an ding ngang lo tih a sawi.
Kumdang anga thlatira sawrkar hnathawkte hlawh an pek theih loh chhan chu sawrkar laipui atanga sum hmuh tur an dawn tlai thin vang a ni tih chief minister hian a sawi a. Hlawh pek theih loh hrim hrim chu an nei loa, tunah chuan central atanga sum an hmuhna – share of taxes leh a dangte lokal hun hi a tlai thin a, thla chanve velah te an pe ta thin tih a sawi. Thla thar ni 1-a pek leh ni 15-a pek pawh a zat a inang reng a, bank loan rulh hun buaina pawh bank hotute an sawipuinaah, computer-a thin hunbi dah anga thin a ni mai a, a takah chuan inngaihnatthiamna a awm tih an sawi thu a sawi a ni.
“Kan sum dinhmun azirin a hma thei ang bera pek chu kan tum a, pawisa min petuten min pek tlai avanga pe tlai ve mai chauh kan ni,” Zoramthanga hian a ti.