Daily Newspaper

DaBaby ‘Rockstar’ a la Hot ber Juice WRLD-a’n Beatles leh Drake record a nih rual


DaBaby ‘Rockstar’ featuring Roddy Ricch chu Billboard Hot 100 (singles) chart-ah a No.1 leh ta a, hetihrual hian Juice WRLD hla panga chu Hot 100 chart Top 10-ah langin, Beatles leh Drake te record a nihrual ve chiah bawk.

Billboard Hot 100 (singles) chart hi kar khat chhunga US-a hla lar ber tihna a ni mai a, hla mal hralh tam dan te, streaming leh radio-a an zaitir nasat dan te chu tehna pawimawh a ni.
‘Rockstar’ hi kar ruk chhung he chart-ah hian a No.1 tling ta a, chart ranking siam nana pawimawh hrang hrangah a la chetha riau a, karleh chart-ah pawh a la No.1 leh thei maiin a rinawm.

Hetihrual hian Juice WRLD hla panga chu Hot 100 chart top 10-ah a rualin a lang thawt mai a, hetiang ti thei hi the Beatles leh Drake te chiah an la awm a, Juice WRLD hi a pathumna niin, thih hnua hetiang thleng thei awm chhun a la ni bawk.

Juice WRLD thih hnua a album an tlangzarh ‘Legend Never Die’ chu Billboard 200 (albums) chart-ah pawh No.1-ah a debut a, he album-a a hla ‘Come & Go’ featuring Marshmello chu No.2-ah a debut a, a hla dang ‘Wishing Well’ chu No.5 niin, ‘Conversations’ chu No.7 a ni a, ‘Life’s a Mess’ featuring Halsey chu No.9 niin, ‘Hate the Other Side’ featuring Marshmello, Polo G & The Kid LAROI chu No.10 a ni bawk.

Tihian a hla panga chu chart top 10-ah a lang a, he chart history kum 62 chhunga hetiang ti thei pathumna a ni a, Drake hian July 2018 khan hetiang dinhmun hi a lo thleng tawh a, The Beatles chuan April 1964 khan record an lo siam tawh bawk a ni.

Tihian Juice WRLD hi Hot 100 chart top 10-ah hla pariat hmangin a lang ve ta a, Octiber 2018 khan a hla hit ‘Lucid Dreams’ chu No.2 a kai a, YounfBoy Never Broke Again nena an thawhdunna ‘Bandit’ chu October 2019 khan No.10 kaiin, Eminem a feature-na ‘Godzilla’ chu No.3 a lo kai tawh bawk.

Marshmello tan Hot 100 chart top 10-a lan vawi hnihna a ni a ‘Come & Go’ bakah hian Bastille nen February 2019 khan ‘Happier’ chu No.2 an lo kaipui tawh bawk a ni.

Halsey tan pawh Hot 100 chart top 10-ah hla paruk a neihna niin, Polo G leh The Kid LAROI te tan chuan an vawikhatna ve ve a ni ve thung.

Jack Harlow ‘Whats Poppin’ featuring DaBaby, Tory Lanez leh Lil Wayne te chu No.3-ah bawk a la awm a, chart No.1 hlui The Weeknd ‘Blinding Lights’ chu No.2 atangin No.4-ah a tawlh ve thung.

Chart No.1 hlui Megan Thee Stallion ‘Savage’ featuring Beyonce chu No.4 atangin No.6-ah a tawlh a, SAINt JHN ‘Roses’ chu No.5 atangin No.8-ah a tawlh ve ta bawk.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy