Dalit hmeichhia pawngsual

Dalit hmeichhia pawngsual
Dalit hmeichhia kum 18 mi chu India chhim lam, Kerala-ah mipa 64-in kum 13 a nih lai atang tawhin mipat hmeichhiatna kawngah an lo khawih thin nia hriat a ni.
Police chuan he thil an chhuinaah hian mi 28 an man tawh a, heng mite hi hren mek an ni a, engmah sawi chhuah an neih hriat a la ni lo.
Mi mante hi kum 17 leh 47 inkar an ni a, an zingah hian hmeichhe thenawm maia mi te, sports coach-te leh a pa thiante pawh an tel niin police chuan an sawi.
Sorkar scheme pakhat hnuaia counsellor-ten an ina kala an kawmnaah hmeichhia hian hetiang thil hi a tawng tih a lo hrilh nia sawi a ni.
Police chuan thubuai 18 chuang an ziak lut tawh a, heng zingah hian Scheduled Castes & Scheduled Tribes (Prevention of Atrocities) Act tlawhchhan pawh a tel a. He dan hi India-a hnam hnuaihnung leh tribal-te humhimna dan a ni.
Dalit-te hi Hindu chi inchhawrdawha a hniam ber an ni a, India-ah hian danin hum hle mah se endawngna leh tihnawmnah an tawk nasa hle.
Hmeichhia hi an khawih tirhin kum a la tlin loh avangin naupangte humna, Protection of Children from Sexual Offences Act tlawhchhan pawhin thubuai ziah luh a ni tih police hotu, Nandakumar S chuan a sawi.
Police hian an chhui mek zel a, thubuai ziah belh pawh a la awm rin a ni a. A chhui tur hian mi 25 awmna team din a ni.
Police chuan hmeichhia hi kum 13 a nih lai atanga hetianga tih hi niin an hria a. An thenawmten chhaihin a thlalak bawlhhlawh tak tak an tihdarhsak niin News Minute website chuan a tar lang.
Kum 16 a tlinin an thenawma miin mipat hmeichhiatna rawngkaiin a khawih leh a, an khawsak dan video a record a, mi dang hnenah a pe chhawng a. A pekte hian ngam phah nan an hmang zui ta niin an sawi.
An chenna district-a Child Welfare Committee (CWC) dan hre mi chuan hmeichhia hi infiam mi a ni a, sports camp hrang hrangah a tel fo va, hei vang hian heng hmunah pawh hian hetiang thil hi a tawng zui ta zel niin Indian Express chanchinbu hnenah a sawi.
Police chuan kum nga liam ta chhung khan pawngsual rawn pawh tum thum a tawng niin a insawi tih an sawi.
Amah khawihtute hian a pa phone number atangin an bia a, an contact pawh phone-ah hian a dah vek niin a sawi a. Police pawhin a phone atang hian an chhui zui ta ni.
A chhungte chuan hetiang hi a tawng ang tih an ring phak lo va. Thla hmasaa counsellor rualin an tlawha a chanchin a lo hrilh hnuah CWC-ah thlen nghalin amah leh a nu chu committee hmaa inlan turin tih zui an ni.
“Counselling pek a ni a, psychologist hmaah a inpuang ta a, kum 13 lek a nih lai atanga mipat hmeichhiatna kawnga tihnawmnah a nih dan zawng zawng a sawi ta a ni,” tiin CWC chief chuan Indian Express a hrilh.
CWC nena thawkhova siam awmna tur hmunah amah pawh a him zawk nan dah rih a ni tih a sawi bawk.
He hmeichhe inpuanna hian ram pum a nghawng zui mek a, hmeichhe police officer hnenah pawh la kal tur niin a inpuan zui zel rin a ni.