Daily Newspaper

Damchhunga nupa ni turin engtin nge i tih ang?

5

(chhunzawmna)

Nupa inlaichinnaah inhnial leh inhauh chang a awm lo thei lo, chutiang hunah chuan a tihdan kan thiam chuan inhnial leh inhauhna te pawh nupa min phuar nghettu a ni zawk hlauh thei. Seema chuan, “Nupa inhauh reng rengin mimal taka inbeih loh tur a ni a, mahni thiam inchantir tum sa ran loh tur a ni. I kawppui chu i kawppui a nihnaah zahna lantir la, in inhnial thinrim lai pawhin a chak lohna te phawrh lan sak kher suh,” a ti. Nupa inhauh leh inhnialin a thiam zawk leh thiam lo zawk awmtir tum kher tur a ni lo a, a dik leh dik lo zawk awmtir pawh tum kher tur a ni lo. Kan kawppuite tlin lohna leh fel tawk lohna, kan duhthu an sam lohna lai te chu thinrim laia sawichhuah loh tum hram hram tur a ni. Kan inhauh laia kan tawngkam hmante hian a hnuah min vaw let leh a, a hnu thlenga kan boruak tichhe theitu a ni thin.

Nupaa inchhaih deuh har har dan te pawh zir ve tur. Inneih rei deuh hnuah phei chuan ngaia inneih te a awlsam em em a, chuvangin kan nupa inkara tek deuh sek sek khan chhem nung reng tura tan kan lak thiam a pawimawh. Seema chuan, “I nupui/pasal bulah han awm lerh (flirt) ve deuh la, chu chuan in inkar a ti tek thar leh ang,” a ti. Inngaihzawn laia kan inthlahlel ang khan awm reng theih a ni, inneih tak avanga zah deuh tit tet neih loh tur a ni a, mi zingah inngai deuh taka inkuah leh inkaih te tih vel mai mai te pawh zah loh tur, hetianga kan tih hian kan hriatloh karin nupa nun a phuarnghet thei tlat.

Inneih rei deuh hnuah chuan thil reng reng a ni ve tur renga ngaihna te kan nei thin a, hetiang a nih avang hian kan inkara tek deuh sek sek awm thin kha a lo chuai telh telh a, a tawpah chuan a mit ta mai thin. Hei vang hian role play te pawh a tul chang a awm. Nupa ni lo, inngaizawng anga awm a, lenchhuah dun te pawh hi a tha ve riau. A hlimawm a, boruak danglam deuh han tawn khan mi a tiphur a, chu chuan kan inkar boruak a lo chhem alh ve leh thei thin.

Dawhtheihna hi nupa nuna thil pawimawh tak a ni. Kan kawppui te laka zaidawh taka awm thiam te hi zir hram hram tur. Thinchhiat hian tangkaina a nei lo va, nupa nun boruak tichhetu mai mai a ni. Thil tihdun tam tur a ni, in chhung sekrek khawih dun te, hnathawh dun te, bazar dun te, leh thildang kan tihdun theih ang chi chu tihdun tam tum tur, hei hian kan inkar a tinghet telh telh thei.

Buai tak kan nih pawhin nupaa hun thawl leh hun hlimawm hman dunna hun insiam hram hram thin tur a ni. Nupaa zin dun te, kan la kal ngai lohna hmuna kal dun te, kan la tih ngai loh tih dun te, thil zir dun te hi nupa nun tinghettu a ni thei. Nupa chu in-surprise a, thilpek inpek fo te pawh chin tur a ni. Thil tha leh ropui tak a ni kher lo, rose par inpek mai te, card inpek te, chocolate inhawn sak te pawhin tangkaina a nei vek.

(THE AIZAWL POST – Phuah Pawlh)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy