Damdawi hlauhawm Captagon hluar nasa

Europe chuan Middle East nuai mektu damdawi hlauhawm tak a hmachhawn mek tia sawi niin he drugs hlauhawm tak hi Gulf rama nuaichimih tuma hmalakna avangin Syria leh Lebanon ramah siamchhuah nasat mek tia sawi a ni.
Tablet khat $3 atanga $25 thlenga hralhin amphetamine-type pill captagon hi Syrian President Bashar Al-Assad leh a zawlpui Lebanese militia Hezbollah te nena inthlunzawm mimal leh group tena an siamchhuah niin US State Departent leh Treaury te, UK Foreign Office te bakah independent researchers te chuan an sawi.
He damdawi hi Middle East ramah chuan tleirawl atanga low-income workers te ah a lar hle tawh a, he narcotics hi awlsam taka siam theih nia sawi niin hei vang hian ‘the poor-man’s cocaine’ tia sawi ani bawk a. He damdawi hian phurna leh chakna nasa tak siamin, mihring a tiharh a, phurna namen lo leh ngaihhaina te siamin hneh theih loha inngaihna te a thlen tia sawi niin he damdawi hi Iraq leh Syria a militant te nena inzawmna neia sawi a ni bawk.
Think tank New Lines Institute te chuan captagon hi tun hnai kum thum chuhngin $10 billion vel sumdawnna lama hlutna nei der tawh tia sawi niin heta tanga revenue tam ber te chu Assan a inner circile leh allies ten an chang tia sawi a ni bawk a. Assad leh a hote hi kum 2011 Syria uprising avanga Khawthlang ram tena an la kawmserh mek an ni a. Mahse, Assad sorkar chuan he damdawi siamna lamah inhnamhnawihna an neih loh thu erawh an sawi thung.
Captagon hi Europe mai ni lo khawvel pum tana hlauhawm a ni tiin official leh experts te chuan an sawi a. Tun hnaiah Saudis te chuan he damdawi in nasa zawka a luhchilh loh nana an hmalakna chuan he damdawi siamtute chu kawngthar leh market thar a zawntir tiin experts te chuan an sawi.
“He damdawi siamtu leh thehdarhtute hian ruahmanna leh thiamna thar neih belh zelin market thar an zawng reng a, kawng thar dap zelin consumption market neih belh an tum zel a ni,” tiin Caroline Rose, director, New Lines Institute captagon trade chhuichiangtu chuan a sawi a.
European Union official te pawhin captagon chuan Europe luhchilh zel dawnin hei hi Syria in sum a amamwhna leh Assad an addict theih damdawi thawn chhuaka amah leh an ram duhlotu nia a hriatte rama buaina siam a tumna kal zel tiin an sawi bawk.
US ang bawkin European powers te chu Assad paihthlak a nih theih nana lungawilohna lantir thlawptute niin chumi hnuah politics thila raltlante leh Assad dotu rebel group te chu an thlawp zui a ni.
Tun dinhmunah erawh captagon chu Europe-ah harsatna siam tham a la ni lo an ti thung a, mahse, policymaker leh official te chuan an ngaihven takzeta hlauthawnna an nei nasa hle an ti bawk.
Kar kalta khan Sky News Arabia tena an kawmnaah Assad chuan indona, sorkar chak lo leh eirukna te chuan Syria chu captagon siamchhuahna leh zawrhna hmunpuiah a siam tawh tia sawiin mahse a sorkar erawhin inrawlhna a nei lo a ti thung a. Khawthlang ram te chu amah dotute an thlawp avanga Syria-a buaina nasa zawk thlentu tiin a puh bawk.
New Lines Institute’s Rose te chuan Iraq leh Turkey te chu he damdawi trans-shipment point ni reng thin an ni a, tunah chuan destination market an ni tawh an ti a. August thlatir lam khan Iraqi thuneitute chuan July thlaa captagon factory an hmuhchuah hnuah an key network te finfiahin chet an la zui tawh a.
Kum 2020 khan Greece leh Italy ah captagon 14 tons man a ni tawh a, hei mai bakah hian captagon warehouse te hmuhchhuah a ni fo tawh bawk.
Kum 2021 khan Austrian investigators te chuan Lebanon leh Syria atanga Europe a captagon tawlh thin transnational gang te an tidarh tawh a. Heng gang te hian pizza oven chungah leh washing machine chhungah damdawi hi an thukru thin a ni.
Captagon tawlhtu thenkhatte chuan puitute puihna man lawmman an pekah he damdawi hi pawisa fai aia pek te an neih avangin hei vang hian local market ah hmuhtur a tam phah tiin United Nations Office on Drugs and Crime te chuan an sawi bawk.
Nikum khan Brussels, London leh Washington te chuan Syrian leh Lebanese mi thenkhat an zinga Assad a cousin pathumte pawh telna chu captagon siamchhuaktute tiin an lo hrek tawh bawk a.
He damdawi hi kum 1960 chho khan Germany-ah hmuhchhuah hmasak ber niin a hmingah ‘Captagon’ tih a ni a. A siam nana hman ber chu fenethylline niin attention-deficit hyperactive disorder leh narcolepsy te enkawl nana hman thin a ni.
Soviet Union kehchhiat hnu khan Syria leh Lebanon chu he damdawi siamchhuahna hmunpui a ni chho zui ta a ni. Syria-a Assad a talbuaia amah paihthlak tuma hmalakna nasa tak aawm hnuah he damdawi siamchhuah hi a pungta thur thur nia sawi a ni bawk a. Gulf Arab states te chu he damdawi hralhna leh leina hmunpui bera ngaih a ni.
Tun hnai kum thum chhungin Saudi Arabia-ah Captagon mum 1 billion chuang man a ni tawh a. Captagon hi thunun a nih vat loh chuan Crown Prince Mohammed bin Salman a Vision 2030 economic transformation plan chuan a tuar dawn an ti bawk.