Damdawi in atangin Oscar chhuak fel
Karliamta Thawhlehni daih tawha lung tha lo avanga training centre-a nikhaw hre loa a tluk hnuah damdawi ina dahluh niin, Pathianni khan Chelsea leh Brazil midfielder hlui Oscar chuan hospital a chhuahsan ta tih a khelh mekna club Sao Paulo thuchhuah chuan a tarlang.
Kum 34-a upa Oscar hian dan pangngaiin season thar atan physical test a hmachhawn a, a han intilum vel chu a chau ta thut a, Brazilian club hian damdawi in lamah hruai nghalin, Einstein Hospital Israelita khumah a han mu hman ren rawn a; kha tih chhung khan a dinhmun chu uluk taka endik niin, hospital hmuhchhuah danin Sao Paolo player natna chu ‘episode of vasovagal syncope’ tih a ni.
‘Vasovagal syncope’ an tih chu nikhaw hre loa tlukna thlentu natna tlanglawn tak niin, thawk leh khata blood pressure leh heart rate tlahniam thut ang chi hi a ni.
Club thuchhuahin a tarlan zel danin, Oscar hian ni tlemte chhung chu chawlh (medical rest programme) a hmang chhunzawm dawn a; a lan danah chuan lung natna serious tak a nih hmel loh a, a career pawh chhunzawm leh mai thei tura ngaih a ni.
Oscar hian Chelsea chhuahsanin China ramah kum riat hun a hmang a, chu mi hnuah nikum mai khan a career bul a tanna Sao Paulo-ah kirlehin, a contract neih laiah kum 2027 thleng khi Brazilian club-ah a la cham thei.
Damdawi in a\angin Oscar chhuak fel
