Kumthar ni a chesual, Hollywood star Jeremy Renner chu in lama inenkawl chhunzawm turin damdawi in atangin a chhuak ta a, a chetsualnaah hian a ruh 30 chuang a tliak niin a sawi a, fans lamin an support-na zawng zawngah lawmthu a sawi bawk.
Jeremy Renner, kum 52, hi January ni 1 khan Reno, Nevada-a a ram chhunga a hman lai vur nawr faina lirthei PistenBully snowplow, kg 6,000 chuanga ritin a chil a, damdawi inah dah luh nghal a ni. PistenBully hi bulldozer ang deuh, vur nawr fai nana an hman thin a ni.
Washoe County Sheriff Darin Balaam-a sawi danin Renner hian a chhungte car khalh nawr chhuah nana a hman hnuah he PistenBully hi ama tawkin a lir leh thut mai a, Renner hi a driver seat-ah zuan luh leh a tum a, chutah chuan chesualin, PistenBully hian a chil zui ta a ni.
Jeremy Renner hi Avengers film-ah pawh Hawkeye lema chang thin a ni a, tunah hian TV series Mayor of Kingstown-ah a chang leh mek a ni. Lemchan khawvelah a mikhual lo hle a The Hurt Locker-a a channa avangin Oscar Best Actor-ah nominate a ni tawh a, The Town film avangin Best Supporting Actor-ah nominate a ni tawh bawk.