Khawl hmanga damdawi in bawlhhlawh sawngbawlna tur, Common Bio Medical Waste Treatment Plant, Tuirial ami chu Nilaini khan UD&PA minister K Sapdanga’n a hawng.
Aizawl Smart City Ltd hmalakna zinga project pakhat niin, Aizawl Municipal Corporation Solid Waste Management Centre, Tuirial huamchhunga sak a ni a; Mizoram Pollution Control Board nena hmalakna a ni. Hawn rual hian sawngbawlna khawl hi a nih dan tur enchhin (demonstrate) nghal a ni.
Treatment plant hian district panga – Aizawl, Kolasib, Mamit, Serchhip leh Saitual a huam a; heng district-a damdawi in, clinic leh healthcare facility medical waste hi a khawnkhawmtu bawlhhlawh motor bik awmin, Tuirial-a Treatment Plant-ah hian paihin khawl hian bawlhhlawh chu a lo sawngbawl dawn a ni. Ttrial run hi Aizawl Municipal area bikah thla hnih chhung atan ASCL-in a kalpui dawn a, hemi rual hian Saitual district bikah H&FW department-in thla hnih chhung a enchhin bawk ang.
UD&PA minister chuan contractor-ten an hna tha takin an thawk nia lang leh a enkawl chhunzawm kawngah pawh thla thum chhung vel an la vil zui thei tur chu lawmawm a tih thu a sawi a. Kan bawlhhlawh sawngbawlna a changkang zel angin mipui pawh bawlhhlawh paih kawngah kan changkan zel a beisei tih sawiin, “Aizawl khawpui hi khawpui fai a nih theih ngei hi kan nghakhlel tlang a, chumi atana thil tangkai tak tur khawl hman theiha peih a ni ta hi a lawmawm takzet a ni,” a ti.
8 Common Bio Medical Waste Treatment Plant hi Bio Medical Waste Management Rules 2016-in a phut anga din a ni.
8 He project atan hian cheng vaibelchhe 9.71 ruahman a ni a. Sawrkar laipuia Ministry of Environment, Forest & Climate Change chuan cheng vbch.2 a tum a ni.
8 Khawl chi li a awm a. Bawlhhlawh hlauhawm leh hri kai hal raltu khawl, bawlhhlawh ti (sterilize) thianghlimtu khawl, bawlhhlawh thialsawmtu khawl leh tui leh damdawi thli lo tithianghlimtu khawl a ni.
8 Bawlhhlawh phurtu motor-te hi silfai nghal zel tur an nih avangin Treatment Plant-ah hian silfaina hmun a awm a; bawlhhlawh dah khawmna hmun bik pawh felfai taka siam niin, power khaihlak changa khawl chawm thei tur generator 250kVA a hmunah hian dah a ni.
8 He treatment plant hi damdawi in bakah clinic leh healthcare facility zawng zawng hnawm (medical waste) sawngbawlna hmun a ni a. Mizoramah hetiang treatment plant hmasa ber tur niin, mipui vantlang hriselna lamah he project hi ram hmasawnna rahbi pawimawh tak nia ngaih a ni.