Northeast Special Infrastructure Development Scheme kaltlanga khum 100 awm theihna tur Kolasib District Hospital sak mek chu Thawhtanni khan Kolasib bialtu MLA, minister K Lalrinliana chuan a tlawh a. Dialysis building, Blood Bank, laboratory leh ward hrang hrang endikin, hospital-in bawlhhlawh tih ral kawnga harsatna a neih an sawi ho.
Minister chuan Kolasib district mipui hriselna tura inenkawlna hmun changtlung zawk a awm theihna’n NESIDS hnuaiah khum 100 awm theihna tur District Hospital sak a ni chu lawmawm a tih thu a sawi a. A nih dan tur ang taka sak a nih theihna’n PWD lamin uluk taka an vilpui a tul thu leh hmanrua hman leh a sak danah duhthusam lohna lai a awm a nih chuan ennawn leh a, siamtha thuai thin turin thawktute a chah. District Hospital Blood Bank-a thawktu indaih lohna phuhruk a nih theihna’n MLA fund hmangin thawktu pakhat ruahman nghal a nih tur thu a sawi. Laboratory-ah Thyroid function test kalpui theihna tur khawl bun a nih theihna’na hmalak dan tur sawi a ni a. Bawlhhlawh halralna hmun hman chhumzawm theih a nih tak loh avanga District Hospital-in harsatna a tawh sutkian a nih theih nan June 14 hian District Urban Development Office hotute nen sawiho tura tih a ni.
FCS&CA minister hian District Civil Supplies office a tlawh bawk a. Supply kudama buhfai dinhmun enin a that leh that loh a endik. National Food Security Mission hnuaia chhawngkaw tinin chanvo an neihte dik taka pekchhuah a nih theihna’n thahnemngai taka thawk zel turin thawktute a chah.
Kolasib Dumluia sawrkarin a enchhinna atana a siam chakai farm tlawhnaah DFDO chuan farm chu kartin an vilpui thu leh tun dinhmunah farm pond engemawzatah chakai an inthlapun tawh thu leh hrisel takin an enkawl mek thu a sawi a ni.
Damdawi in sak mek tlawh
