Civil Hospital Lunglei chuan India rama damdawi in tha tehnaa certificate chi thum – National Quality Assurance Standards, LaQshya leh MusQan an hmuh chu September 20 khan an lawm a, Lunglei High Powered Committee (HPC) vice chairman V Malsawmtluanga, MLA chuan a hmanpui.
Civil Hospital Lungleiin India rama damdawi in tha tehnaa certification pathum a dawng thei chu thawktute thawhrimna rah a ni tih HPC vice chairman hian sawiin, Lunglei district chauh ni lo, chhim lam district zawng zawng atanga damna duha mipui tlukluhna a nih angin, an hlawhtlinna chu chhimlam pumpui tana hlawhtlinna nia a hriat thu a sawi. Quality certification lawmpui nan HPC Fund chhuak hmasa ber atangin Blood Bank thuamthat nan cheng nuai khat pek an nih tur thu a sawi a ni.
Kumin June 15 khan Civil Hospital Lunglei hian sawrkar laipui Ministry of Health & Family Welfare atangin damdawi in inrelbawlna, hmanrua leh thawktute theihna, thiamna leh hnathawh dan phunga tehfung hrang hrang 369 hmanga India rama hospital tha bik tehna, National Quality Assurance Standards (NQAS) certification hmuin, a dang pahnih – MusQan (naupang lam enkawlna tha bik) leh LaQshya (nau neihna hmun tha bik) certificate a dawng tel bawk. Hmarchhak bikah Civil Hospital Aizawl nen a ruala hetiang certificate pathum hi dawng thei hmasa ber an ni a. NQAS-ah 93.9%, MusQan-ah 94% leh LaQshya-ah 96.13% hmuin, Mizorama certification hmu zingah point hmu sang ber an ni. Certification hi kum thum chhung nung tur a ni.
Damdawi in tha thlanah Civil Hospital Lunglei tel
